«Андижон» клуби футболчи Виталий Мирний олдидаги қарзларини ўз вақтида бартараф эта олмагани учун ФИФА томонидан жазоланди. Бу ҳақда Профессионал футбол лигаси директори вазифасини бажарувчи Диёр Имомхўжаев маълум қилди.
Имомхўжаевнинг таъкидлашича, клуб 2021 йилги мавсум учун қишки ва ёзги, шунингдек, 2022 йилги мавсум учун қишки трансфер ойнасида янги футболчилар билан шартнома имзолай олмайди. Агар клуб собиқ футболчиси олдидаги қарзларини узса, бу тақиқ олиб ташланади.
Қайд этиш жоиз, аввалроқ ФИФА Ғузорнинг «Шўртан» клуби учун ҳам 2021 йилги мавсумнинг қишки трансфери учун тақиқ қўйганди.
Маълумот учун, украиналик дарвозабон Виталий Мирний 2019 йилдан «Андижон» сафида ҳаракат қилиб келган. Бир неча ой олдин клубдаги молиявий муаммолар сабаб томонлар ҳамкорликни тўхтатишга қарор қилган.
«Андижон» Суперлиганинг 21-туридан кейин 13 очко билан 12-ўринда бормоқда. Жамоа кейинги турда «Сурхон» майдонига сафар қилади. Учрашув 1 ноябрь санасига белгиланган.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)