Қирғизистон парламенти спикери Канат Исаев шифокорлар пандемия пайтида статистикани камайтириб кўрсатиш учун COVID-19’дан ўлимлар сонини яширганини маълум қилди. «Кабарлар»нинг ёзишича, бу ҳақда у парламент йиғилишида Меҳнат ва ижтимоий ривожланиш вазири лавозимига номзоди кўрсатилган Аида Исмоиловага қарата мурожаат қилганида айтган.
Фото: Акипресс
«Бош вазир ўринбосари бўлган пайтингизда қирғиз халқи пандемияга дучор бўлди. Ушбу касаллик туфайли қанча одам вафот этди? Даволаш протоколи бир неча марта ўзгартирилди. Бу касаллик аввал мамлакатимизда аниқланган бўлса, бошқа гап эди. Ахир ҳаммаси Хитойда бошланди, кейин Италия ва Россияда тарқалди. Нотўғри даволаш оқибатида мингдан ортиқ фуқароларимизни йўқотдик. Менда шифокорлар коронавирусдан ўлимни яшириб, одамлар юрак хасталиги туфайли вафот этган, деб ёзишгани ҳақида аниқ маълумот бор. Статистикани камайтириб кўрсатиш мақсадида шундай қилишган. Далиллар бор», — деган Исаев.
Шунингдек, Аида Исмоилова бош вазир бўлган ҳукумат айби билан касаллик шу даражага келганлигини таъкидлаган.
Эслатиб ўтамиз, Ўзбекистонда ҳам сўнгги вақтларда ўлим ва касалланганлар бўйича реал рақамлар хусусида ишончсизлик келтириб чиқараётган ҳолатлар кузатилганди. Хусусан, Коррупцияга қарши курашиш агентлиги директори Акмал Бурҳонов Самарқандда коронавирусдан даволанаётганлар расмий статистикаси 10 баравар камайтириб кўрсатилганини айтган. «Юксалиш» умуммиллий ҳаракати коронавирус статистикаси ишончлилиги, тестлар, шунингдек, COVID-19’га қарши кураш бўйича махсус штабнинг «номаълум» таркибли мутахассислари ва қабул қилинаётган қарорларнинг самарадорлиги юзасидан масъулларга бир нечта саволлар билан юзланган.
Ўзбекистон Соғлиқни сақлаш вазирлиги расмийлари эса давлат коронавирус статистикасига доир маълумотларни яшириш ёки уларни бузиб кўрсатишдан манфаатдор эмаслигини таъкидлаган. Шунга қарамай, ССВ томонидан юритилаётган статистика шубҳали ва ишончга сазовор эмаслиги ҳақида «Дарё» бир неча бор чиқиш қилган.
Фаол жамоатчилик томонидан юритилаётган ўлим статистикаси вазирлик статистикасидан тобора фарқ қила бошлаши фонида вазирлик вафот этганларнинг исм-фамилияси бош ҳарфлари, жинси, ёши, қаерда яшагани ҳақидаги маълумотларни эълон қилишни ҳам тўхтатганди.
