Берлин ҳайвонот боғида Килагуни лақабли дунёдаги энг кекса урғочи қора каркидон вафот этди. Бу ҳақда ҳайвонот боғи ўзининг Twitter’даги саҳифаси орқали маълум қилди.
«Алвидо, қария! Бугун Килагуни билан видолашамиз. Дунёдаги энг кекса қора каркидон ёшга боғлиқ одатдаги муаммолари билан кўпроқ курашишга мажбур бўлаётганди», — дейилади хабарда.
Шунингдек, таъкидланишича, ҳайвонот боғи жонзот азоб чекмаслиги учун уни инъекция юбориш орқали ўлдириш бўйича қарор қабул қилган.
Килагуни 46 ёшда эди. Табиий шароитда каркидонлар камдан кам ҳолларда 30 йилгача яшайди: ноқонуний ов уларнинг ҳаётига катта таъсир кўрсатади. Вояга етган каркидоннинг бошқа ҳайвонлар орасида душмани бўлмайди, уларга фақат инсонлар таҳдид солади: ҳайвоннинг шохида доривор хусусиятлар мавжудлиги сабаб у қимматбаҳо ўлжа ҳисобланади.
«2008 йилдан бери Жанубий ва Шарқий Африка мисли кўрилмаган браконьерликка дуч келди. Сўнгги ўн йил ичида браконьерлар етти мингдан ортиқ каркидонни ўлдирди», — дейилади ҳайвонот боғи хабарида.
Изоҳ (0)