Американинг Огайо штатида олти ёшли қизча дезинфекция воситаси билан ўйнаб, куйиб қолди. Қизалоқнинг дўстларидан бири унинг санитайзер суртилган юзини бехосдан ёқиб юборган, деб ёзади The Sun.
Маълум бўлишича, қизалоқ боғда дўстлари билан бир-бирга антисептик сепиб ўйнаётган бўлган. Болалардан бири «зажигалка» олиб келиб, бехосдан унинг юзига ўт қўйиб юборган. Болакай зудлик билан шифохонага етказилган.
Жароҳат сабаб қизалоқнинг бир қулоғидан иккинчисига қадар чандиқ қолган. Онасининг сўзларига кўра, олинган жароҳат сабаб фарзанди уч ой кўзгуга қарашдан бош торган. Бундан ташқари, у мактабдаги онлайн дарслар вақтида тез-тез камерани ўчириб қўяди.
«Қайсидир кунлари у ўзини яхши ҳис қилади. Бир кун чандиқларига эътибор бермай қўйишга уринса, эртаси куни жуда хафа бўлиб, яна хунук эканлигини ўйлай бошлайди», — дейди қизалоқнинг онаси. Ҳозирда у чандиқлар битиши учун уни боғлаб юришга мажбур.
Озиқ-овқат маҳсулотлари ва тиббиёт воситалари сифатини назорат қилиш бошқармаси айрим нопок ишлаб чиқарувчилар санитайзерларга метил спирти қўшган бўлиши мумкинлигидан харидорларни огоҳлантирган. Бу тез аланга олувчи токсик восита бўлиб, кўплаб маротаба кўрлик ва куйиш ҳолатларни юзага келтирган.
Изоҳ (0)