Украинада ўтган бир кеча-кундузда коронавирусга чалиниш билан боғлиқ 7053 та янги ҳолат қайд этилиб, кунлик антирекорд янгиланди, деб хабар бермоқда «Korrespondent.net», мамлакат миллий хавфсизлик ва мудофаа кенгашининг 22 октябрдаги маълумотига таяниб.

Фото: EPA

Пандемия бошидан буён Украинада 322 879 кишида COVID-19 аниқланган. Касаллик оқибатида сўнгги суткада 113 киши, умумий ҳисобда эса 6043 киши вафот этган.

Касалликдан 129 533 киши соғайган, улардан 2679 нафари сўнгги суткада тузалиб чиққан. Беморларнинг 181 938 нафари даволанишда давом этмоқда.

Энг кўп касалланиш ҳолатлари Киев (+631), Харков (+627), Одесса (+600) вилоятларида қайд этилган.

Октябрь ойи бошларида Жаҳон соғлиқни сақлаш ташкилоти Украинада кунлик касалланиш кўрсаткичи келгуси ойларда икки баравар кўпайишини ва кунига 7000 дан 9000 тагача ўсишини тахмин қилганди. Мамлакат президенти Владимир Зеленский Украинада бир кеча-кундузда касалланганлар сони 9,5 минг кишидан ошса, қатъий чекловлар жорий қилинишини айтганди.

Украинада 12 мартдан умумий карантин жорий қилинганди. 11 майдан бошлаб айрим чоралар юмшатилган ва маҳаллий ҳукуматга вазиятга қараб карантинни кучайтириш ёки камайтириш ҳуқуқи берилган. Яъни бутун мамлакат бўйлаб эмас, фақат тегишли ҳудудлардагина чекловлар кучайтирилган. Кейинчалик карантинни ноябрь ойигача узайтиришга қарор қилинган.