Англия Премьер Лигасида иштирок этадиган жамоалар сони 18 тагача қисқариши мумкин

«Ливерпуль» ва «Манчестер Юнайтед» жамоалари Премьер Лигага ўзгартиришлар киритишга ҳаракат қилмоқда.

Икки клуб биргаликда катта ўзгаришларга олиб келадиган таклиф тайёрлади. Лойиҳа билан «Ливерпуль»га эгалик қиладиган АҚШнинг Fenway Sports Group компанияси шуғулланди.

Унга кўра, Премьер Лига жамоалари сонини 20 дан 18 тага қисқартириш таклиф этилган. Чемпионшипда эса 24 та жамоа бўлади. Учинчи ва тўртинчи дивизионларда умумий 90 та жамоа ҳаракат қилади.

Молиявий томон ҳақида гап кетганда, клублар Англия футбол Лигасига (EFL) инқироз вақтида ёрдам тариқасида 250 миллион фунт миқдорида аванс тақдим этмоқчи. Шунингдек, йилига даромаддан 25 фоиз улуш бериш режалаштирилган. Яна юз миллион фунт миқдорида Англия футбол ассоциациясига (FA) ўтказиш белгиланган.

Лойиҳага кўра, Премьер Лигада қолганлардан кўпроқ муддатдан бери иштирок этиб келаётган тўққиз клуб АПЛнинг барча соҳалардаги йўналишини белгилайди.

Мазкур режани EFL раҳбари Рик Парри қўллаб-қувватламоқда. У «Ливерпуль» хўжайинлари, америкалик инвестор Жон Генри, шунингдек, аксионери ва директор Майкл Гордон билан музокаралар ўтказган. Бундан ташқари Парри «Манчестер Юнайтед»га эгалик қиладиган Глейзерлар оиласи билан ҳам суҳбат қурган.

Лойиҳа муаллифлари «Манчестер Сити», «Арсенал», «Челси» ва «Тоттенҳэм» каби катта клублар томонидан қўллаб-қувватлашни кутмоқда.