Коронавирус билан касалланган АҚШ президенти Дональд Трамп Мериленд штатидаги Уолтер Рид миллий тиббиёт марказида бир неча кун даволанади. Бу ҳақда АP’га таяниб, Meduza хабар бермоқда.

Фото: BBC

Оқ уй ахборот хизматининг хабарига кўра, Трамп президентлик вазифасини касалхонада давом эттиради. Президент ўз хизмат вазифаларини давом эттириши учун у ер барча зарур нарсалар билан жиҳозланган.

Трамп администрацияси 2 октябрь тушдан кейин АҚШ президенти чарчаган, аммо кўтаринки кайфиятда эканлигини маълум қилган.

Маълум қилинишича, АҚШ президенти ёши (у 74 ёшда) ва вазни (2019 йилда 110 килограмм эди) туфайли хавф гуруҳига киради.

Трампнинг даволовчи шифокорининг айтишича, COVID-19 ташхиси тасдиқлангандан сўнг Америка президенти Regeneron препаратининг саккиз граммли дозасини олган. Бундан ташқари, Трамп цинк, D витамини, фамотидин, мелатонин ва аспирин қабул қилган.

Эслатиб ўтамиз, Дональд Трамп ва унинг турмуш ўртоғи Мелания Трампда 2 октябрь куни коронавирус аниқланди. Катта эҳтимол билан вирус уларга Трампнинг маслаҳатчиси Ҳоуп Хиксдан юққан бўлиши мумкинлиги таъкидланган.

Аввалроқ Шавкат Мирзиёев коронавирусга чалинган Дональд Трампга мактуб йўллаб, унинг тез фурсатда соғайишини тилагани хабар қилинганди.