Беларуснинг Европа Иттифоқи мансабдор шахсларига нисбатан жорий қилган санкциялари автоматик тарзда Россияда ҳам амал қилади. Бу ҳақда Россия Ташқи ишлар вазирлигининг расмий вакили Мария Захарова маълум қилди, деб ёзмоқда Meduza.
Захарованинг қайд этишича, бу »иттифоқчилик мажбуриятларига мувофиқ» амалга ошади.
Вазирлик томонидан таъкидланишича, Россия Европа Иттифоқининг санкцияларини «мамлакат ичидаги вазиятни тартибга солиш бўйича чоралар кўраётган Беларусь ҳукуматига нисбатан очиқ ва қабул қилиб бўлмайдиган босим» деб ҳисоблайди.
«Европа Иттифоқи вакиллари ва унинг аъзо мамлакатлари бир неча марта уларнинг ёндашувида геосиёсат йўқлигини маълум қилди. Бироқ Европа Иттифоқи томонидан қабул қилинаётган қарорлар, таҳдид тили ва Беларусга нисбатан бошқа ҳаракатлар бунинг акси ҳақида гувоҳлик бермоқда», — дейилади Россия Ташқи ишлар вазирлиги баёнотида.
Эслатиб ўтамиз, Европа Иттифоқи етакчилари сайловнинг сохталаштирилиши ва инсон ҳуқуқлари бузилиши учун жавобгар бўлган Беларуснинг 40 нафар расмий шахсига нисбатан санкциялар жорий қилишга қарор қилди. Европа Иттифоқининг санкцияларига жавобан Беларусь европалик мансабдорларга нисбатан ўзининг санкцияларини жорий қилди, бироқ «мавжуд замонавий дипломатик амалиётга» мувофиқ санкция остига тушган мансабдорлар рўйхатини эълон қилмади.
Изоҳ (0)