Россия Премьер Лигасининг 9-турида «Ростов» 27 сентябрь, якшанба куни Туланинг «Арсенал» жамоаси билан баҳс юритди.
Фото: Twitter/@rostovfc
Учрашувнинг 9-дақиқасида Эванс Кангва тулаликларни олдинга олиб чиқди. Орадан тўрт дақиқа ўтиб, Евгений Чернов мувозанатни тиклади. Биринчи бўлим якунида «Ростов»нинг япониялик ярим ҳимоячиси Кенто Ҳашимото кетма-кет икки бор мезбонлар дарвозасини ишғол қилди.
Иккинчи бўлимда мезбонлар ташаббусга эга бўлди, бироқ ростовликлар дарвозаси томон ҳакам томонидан қўшиб берилган вақтга келиб йўл топа олди. Муҳаммад Қодири учрашув якунланиши арафасида ҳисобни қисқартирди.
Таъкидлаш жоиз, ўйин кескин кураш ва қўполликларга бой бўлди. Учрашув ҳаками чўнтагидан ўн марта сариқ ва бир бора қизил карточка олишга мажбур бўлди.
Ўзбекистонлик ҳужумчи Элдор Шомуродов ўйинни асосий таркибда бошлади ва 70-дақиқада захирага олинди.
Мазкур ғалабадан кейин Валерий Карпин шогирдларининг очколари 17 тага етди ва жамоа 3-ўринга кўтарилди.
РПЛ
9-тур баҳси
27 сентябрь, якшанба
«Арсенал Тула» — «Ростов» 2:3
Голлар: 1:0 – 9 Кангва, 1:1 – 13 Чернов, 1:2 – 40 Ҳашимото, 1:3 – 45 Ҳашимото, 2:3 – 90+4 Муҳаммад.
«Арсенал Тула»: Левашов, Бурлак, Bauer, Беляев, Сокол (Комбаров, 46), Кангва (Муҳаммад, 46), Ковалев (Хлусевич, 71), Горбатенко (Ажоев, 81), Костадинов, Кангва, Ткачев (Громико, 82).
«Ростов»: Бабурин, Осипенко, Козлов, Чернов, Ҳажикадунич (Чистяков, 46), Глебов, Норманн, Ионов (Полоз, 62; Долгов, 90), Байрамян (Еременко, 90), Ҳашимото, Шомуродов (Логашов, 70).
Огоҳлантиришлар: Ионов (17), Чернов (24), Ковалев (35), Кангва (38), Байрамян (48), Bauer (48), Норманн (52), Ҳашимото (53), Глебов (54), Комбаров (60).
Четлатиш: Глебов (66).
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
