Samsung компанияси янги инновацион ишланмаларини фойдаланувчиларга қулай нархларда тақдим этиш учун Galaxy А смартфонлар туркумига асос солган эди, деб ёзади «Terabayt.uz».

Фото: Pixabay

Икки йил аввалги Samsung Galaxy А9 модели эса дунёдаги биринчи квадрокамерали телефон сифатида тақдим этилган.

Энди эса бу компания ўзининг пентакамерали илк смартфони – Galaxy А72 моделини тайёрламоқда. Айтиш керакки, Xiaomi, Huawei ва Nokia кабиларнинг бош камераси беш модулли смартфонлари бозорда аллақачон чиққан. Инсайдерларга кўра, Galaxy А72 гаджети Samsung’нинг биринчи пентакамерали смартфони бўлса-да, компания унинг ортидан шундай яна бир нечта қурилма чиқаради.

Хабарга кўра, Samsung Galaxy А72 бош камерасида асосий датчик 64 мегапикселлик аниқликда бўлади. Иккинчи – 12 МПлик сенсорга эса кенг бурчакли объектив бириктирилади. Навбатдаги – 8 мегепикселлик модул уч карралик оптик зум билан тақдим этилади. Макросёмка ва саҳна чуқурлигини аниқлаш эса ҳар бири 5 мегапикселлик алоҳида-алоҳида датчиклар қўлланади. Galaxy А72 селфи ишқибозларига ҳам маъқул келади – унинг олд камераси 32 мегапикселлик бўлишини айтишмоқда. Samsung бу моделини 2021 йилнинг биринчи ярмида тақдим этади.