Самарқанд вилоятининг Ургут туманида 6251 нафар ўқитувчининг 2016 нафари коронавирусга тест топширган ва 4 сентябрь куни 250 нафар ўқитувчидан 37 нафарида вирус аниқланган, дея хабар бермоқда «Zarnews». Қолган 1766 нафар ўқитувчидан олинган тест намуналари натижаси ҳали тақдим этилмагани айтилмоқда.
Шунингдек, вилоятнинг бошқа — Нуробод туманида педагогларнинг коронавирусни аниқлаш бўйича ПЗР тестларида 43 нафар ходимнинг натижаси мусбат эканлиги аниқланиб, етишмайдиган мутахассисларни қоплаш мақсадида туман халқ таълими бўлими услубчиларини жалб этиш режалаштирилгани маълум қилинди.
Мавжуд вазиятдан келиб чиқиб, Нуробод тумани депутатлари ҳудуддаги барча мактабларда ўқув йилини 14 сентябрдан, Ургут тумани депутатлари эса 21 сентябрдан анъанавий шаклда бошлашга овоз берган. Аввалроқ Пайариқ туманидаги 60 нафар ўқитувчида, Жомбой туманида 40 нафар ўқитувчида коронавирус аниқлангани ҳақида хабар берилган эди.
Жиззах шаҳар ҳокимлиги ахборот хизматининг хабар беришича, шаҳардаги умумтаълим мактабларининг коронавирусга тест топширган ўқитувчиларидан 52 нафарида инфекция аниқланган (айнан қанча ўқитувчи тест топширгани маълум қилинмаган). Андижон вилоятида эса 25 минг ўқитувчи тест топширган бўлиб, уларнинг камида 52 нафарида коронавирус аниқланган.
