Пневмония бошланганини билдирувчи оддий симптомлар

Шамоллаш ва нафас йўллари билан боғлиқ касалликларни ўтказиб юбориш айрим ҳолда пневмонияга олиб келиши ҳам мумкин. «Домашний очаг» нашри яширин пневмонияда кузатиладиган асосий симптомларга тўхталиб ўтади.

Пульснинг тезлашиши

Юрак уришининг тезлашиши бежизга бўлмаслиги мумкин. Пульсингизни текшириб кўринг, агар 1 дақиқада 100 мартадан кўп бўлса, шифокорга мурожаат қилинг.

Кўкрак соҳасида оғриқ

Ўпкада инфекция бўлса, кўкрак соҳасида оғриқ кузатилиши, йўталганда ёқимсиз ҳис ёки оғриқ сезишингиз мумкин. Оғриқнинг тўхтамаслиги мутахассисга зудлик билан мурожаат қилиш учун асосли сабаб бўла олади.

Ҳўл ва ҳолдан тойдирадиган даражадаги йўтал

Йўталнинг қуруқ бўлмаслиги яхши, чунки бундай йўтал балғам кўчишига ёрдам беради. Лекин йўтал доимий ҳўл бўлса ва енгиллик ҳис этилмаса, шифокор қабулига ёзилиш керак. Тинкани қуритадиган йўтал пневмониянинг аломати бўлиши мумкин.

Йўталганда қон аралаш ажралма

Йўталгандаги ажралма қон аралаш ёки занг рангига ўхшаб кетса, бу ўпкада инфекция борлигидан далолат бериши мумкин. Бу жуда ҳам жиддий симптом ҳисобланади ва зудлик билан шифокорга мурожаат қилиш керак бўлади.

Титраш

Титраш ва юқори ҳарорат ўпкаларда яллиғланиш борлигидан дарак бериши мумкин. Сизда ушбу ҳолат кузатилса, иккиланиб ўтирмай мутахассис кўригидан ўтинг.

Нафас олишнинг қийинлашиши

Нафас олишда қийналиш, бефарқ бўлиш керак бўлмаган пневмониянинг яна бир симптомларидан бири ҳисобланади ва аксар ҳолларда инфекция яхшигина тарқалиб бўлганидан кейин кузатилади. Дарҳол тиббиёт ходимларига мурожаат қилиш керак, акс ҳолда қон етарли миқдорда кислород билан таъминламаслиги оқибатида бош айланиб, ҳушдан кетиш мумкин.