Ўзбекистон Президенти Шавкат Мирзиёевнинг тегишли фармони билан Отабек Ҳасанов Президент ҳузуридаги Давлат хизматини ривожлантириш агентлиги директорининг биринчи ўринбосари лавозимига тайинланди. Бу ҳақда агентлик томонидан маълум қилинди.
Отабек Ҳасанов 1985 йилда Тошкент вилоятининг Олмалиқ шаҳрида туғилган. У 2006 йилда Ўзбекистон Миллий университетининг бакалавр босқичини, 2008 йилда Ўзбекистон Миллий университетининг магистратура босқичини тамомлаган. 2013 йилда Ўзбекистон Президенти ҳузуридаги Давлат бошқаруви академиясини тамомлаган. Сиёсий фанлар бўйича PhD доктори.
Отабек Ҳасанов шу кунга қадар Президент ҳузуридаги Давлат хизматини ривожлантириш агентлигининг Инсон ресурслари ва кадрлар салоҳиятини ривожлантириш департаменти мудири лавозимида ишлаб келаётган эди.
Шунингдек, Президент фармони билан Амиртемурхон Мусаев Давлат хизматини ривожлантириш агентлиги директори ўринбосари лавозимига тайинланди.
Амиртемурхон Мусаев 1967 йилда Тошкент шаҳрида туғилган. У 1992 йилда Тошкент техника университетини тамомлаган, 2015 йилда «Содиқ хизматлари учун» медали билан тақдирланган.
Мазкур тайинловга қадар Амиртемурхон Мусаев Ўзбекистон Президенти администрациясида масъул лавозимда ишлаб келаётган эди.
Эслатиб ўтамиз, Ўзбекистон Президенти ҳузурида Давлат хизматини ривожлантириш агентлиги Президентнинг «Ўзбекистон Республикасида кадрлар сиёсати ва давлат хизмати тизимини тубдан такомиллаштириш чора-тадбирлари тўғрисида»ги фармонига асосан 2019 йилда ташкил этилган.
Изоҳ (0)