Coca-Cola Суперлига 12-тури доирасида кечган «Машъал» — «Бухоро» учрашувидан (1:0) кейин ҳар икки жамоа мураббийлари иштирокида матбуот анжумани ўтказилди.
Дастлаб бухороликлар бош мураббийи Жамшид Саидов ўз фикрларини билдирди.
«Ўйин жуда қийин бўлди. Қулай имкониятлардан фойдалана олмадик. Ҳар уч кунда бир хил таркиб билан ўйнаш қийин. Футболчилар тез тиклана олмаяпти. Ҳа, мағлубиятга учрадик, аммо ҳаёт давом этади. Келгуси учрашувга бор эътиборимизни қаратамиз», — дея Саидов сўзларини келтирмоқда «Championat.asia».
Шунингдек, муборакликлар устози Ботир Қораев ўз фикрлари билан ўртоқлашди.
«Бу учрашувга жиддий тайёргарлик кўрган эдик. «Бухоро» жамоаси сўнгги поғонада бораётган эди. Шунинг учун ҳам улар бор кучи билан ўйнашини билар эдик. Ўйин бошида бироз қийналдик. Голгача бизда иккита қулай имконият бўлди, аммо фойдалана олмадик. Барчани ғалаба билан табриклайман», — дейди Қораев.
«Машъал» очколарини 16 тага етказиб олди ва 8-ўринда кетмоқда. «Бухоро» (6) эса сўнгги ўриндан жой олган. «Бухоро» 13-турда ОКМК билан ўйнайди, «Машъал» эса «Металлург»га қарши баҳс юритади.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)