Жиззахда уйига тез ёрдам чақирган фуқаро шифокорни калтаклагани ҳақида хабар берилган эди. Мазкур ҳолат юзасидан Ўзбекистон Соғлиқни сақлаш вазирлиги изоҳ берди.
Аниқланишича, 2020 йилнинг 23 август куни соат 12:06 да Жиззах вилоят Call-марказига Зомин тумани «Оқтепа» МФЙ Ж.Сулаймонов кўчасида яшовчи фуқаро А.Б.га яқинлари томонидан чақириқ бўлган. Соат 12:10 да тез ёрдам бригадаси ушбу фуқаронинг яшаш хонадонига етиб борган.
Шифокор 1939 йил туғилган беморни текширувдан ўтказгач, беморнинг умумий аҳволи оғир бўлганлиги сабабли шифохонада стационар шароитда ётиб даволаниши учун олиб кетиш кераклигини айтган.
Аммо дастлабки маълумотларга кўра, беморнинг яқинлари бунга рухсат бермаган. Шундан сўнг тез ёрдам бригадаси томонидан зарур биринчи тиббий ёрдам кўрсатилиб, керакли маслаҳатлар берилган.
Шу куни соат 13:42 да мазкур хонадондан яна қайта вилоят Call-марказига чақириқ бўлган. Туман тез ёрдам бригадаси соат 13:47 да беморнинг яшаш хонадонига етиб борган вақтда беморда биологик ўлим юз берганлиги маълум бўлган.
Тез ёрдам бўлими навбатчи фельдшери Э.И. ушбу ҳолат юзасидан тушунтириш бераётган вақтида беморнинг яқинлари томонидан калтакланган.
Фельдшер Э.И. зудлик билан туман тиббиёт бирлашмаси қабул бўлимига олиб келинган вақтда у карахт ҳолда кўнгли айниб, қайд қилиши кузатилган. Бемор тиббий текширувлардан ўтказилиб, шошилинч хирургия бўлимига ётқизилган. Унга ёпиқ бош мия чайқалиши, бўйин соҳаси юмшоқ тўқимларининг лат ейиши, тери ости гематомаси ташхиси қўйилган.
Вазирликнинг хабарига кўра, айни пайтда беморга шифокорлар томонидан зарур тиббий муолажалар кўрсатилмоқда.
Мазкур ҳолат юзасидан туман ички ишлар бўлимга хабар берилган бўлиб, ҳуқуқни муҳофаза қилувчи орган вакиллари томонидан суриштирув ишлари олиб борилмоқда. Ушбу вазият Соғлиқни сақлаш вазирлиги томонидан назоратга олингани маълум қилинган.
Изоҳ (0)