Бразилиялик аёл ва германиялик эркак интернетда виртуал мулоқот қилганига 20 кун бўлганидан кейин видеотрансляция орқали никоҳдан ўтди. Бунга коронавирус пандемияси сабаб жуфтликнинг юзма-юз учраша олмагани сабаб бўлган.

Фото: Globo

Таъкидланишича, Рирейрау Претуда яшайдиган 39 яшар бразилиялик Синтия Араужо ва 45 яшар германиялик Тимо Арнштадни танишишига уларнинг руҳоний дўсти сабабчи бўлган. Жуфтлик ижтимоий тармоқда гаплашиш давомида ўхшаш жиҳатлари кўп эканини пайқаган. Улар биринчи куннинг ўзида, бир-бирини ҳали яхши таниб улгурмаганига қарамай икки соат суҳбат қурган.

Эркак ва аёл гаплашишда давом этган ҳамда турмуш қуриб бир уйда бирга яшашлари қандай бўлишини билиш учун 24 соат камерани ёниқ қолдирган.

Танишганларига 1 ой бўлиб улгурмасдан Тимо видео орқали Синтинининг қўлини сўраган, аёл эса розилик берган. Аммо мавжуд пандемия сабаб жуфтлик кўриша олмаган ва масофадан туриб никоҳдан ўтишига тўғри келган. Видеоқўнғироқ орқали ташкил қилинган маросимни келин ва куёвнинг қариндошлари томоша қилган.

Куёвнинг сўзларига қараганда, келинни кўрмасдан туриб уйлана олгани ҳақида хабар топган дўстлари Тимонни ақлдан озган деб ҳисоблаган. Аммо унинг фикрича, Синтия ҳақида билганлари: муносабати, феъл-атвори ва гўзаллиги у учун кифоя. Виртуал тўйдан тўрт кун ўтгач, келин-куёв Бразилиянинг Сан-Паулу аэропортида учрашган ва бир-бирига никоҳ узугини таққан.