Хорижда ишлаётган ўзбекистонликларнинг энг кўп қисмини қайси вилоят аҳолиси ташкил этиши маълум қилинди

Халқаро пресс-клубнинг «Меҳнат миграцияси: хавфсиз, тартибли ва қонуний» мавзусида ташкил этилган навбатдаги сессиясида бугунги кунда хорижда қанча Ўзбекистон фуқаролари меҳнат мигранти сифатида ишлаётгани маълум қилинди. Бу ҳақда Халқаро пресс-клуб раиси Шерзод Қудратхўжаев гапириб ўтган.

Бирлашган Миллатлар Ташкилотининг статистик маълумотларига кўра бугунги кунда 2 миллиондан ортиқ, яъни меҳнатга лаёқатли аҳолининг 12 фоизи хорижда ишламоқда.

• Россияда — 1,5 миллион;
• Қозоғистонда — 240 минг;
• Кореяда — 71 минг:
• Туркияда — 43 минг;
• БААда 5 минг ва дунёнинг бошқа давлатларида 120 минг ўзбекистонлик меҳнат фаолиятини амалга оширмоқда.

Ушбу меҳнат мигрантлари вилоятлар ҳиссасида қанча нафарни ташкил қилиши айтилди:

• Самарқанддан — 268 минг;
• Фарғонадан — 247 минг;
• Қашқадарёдан — 178 минг;
• Сурхондарёдан — 164 минг;
• Хоразмдан — 140 минг;
• Андижондан — 132 минг;
• Тошкент вилоятидан — 102 минг;
• Тошкент шаҳридан — 90 минг;
• Бухородан — 88 минг;
• Жиззахдан — 88 минг;
• Намангандан — 69 минг;
• Қорақалпоғистондан — 66 минг;
• Сирдарёдан — 57 минг;
• Навоийдан 25 минг киши хорижда ишлайди.

Пресс-клуб сессиясида, шунингдек, 1991 йилларда Ўзбекистон аҳолиси 20 миллион атрофида бўлгани, бугунги кунда 34 миллионни ташкил этган ҳолда қарийб икки бараварга ошгани билдирилди. 2019 йилда 815 минг одам туғилган бўлса, 388 500 та иш ўрни яратилган. Ҳар йили меҳнат бозорига 700 мингдан ортиқ одам кириб келади.

«Бундан келиб чиқадики, Ўзбекистон ҳукумати бир кунда тахминан 2000 иш ўрни яратиши керак. Лекин буни нафақат Россия, на Ҳиндистон, на АҚШ ҳукумати амалга ошириши имконсиз. Бу ҳафтасига 14 минг иш ўрни дегани», — дейди Шерзод Қудратхўжаев.