Huawei компанияси АКТ соҳасидаги «Honor Cup 2020» Евросиё танловининг бошлаганини эълон қилди. Honor Cup – бу АКТ соҳасида фаол ривожланаётган иқтидорли мутахассисларни жалб қилиш ва талабаларнинг мустақил ўқишга бўлган қизиқишини ошириш учун Huawei компанияси томонидан яратилган таълим лойиҳаси. Ўтган йили танловда 1000 га яқин университетлардан 15000 нафардан ортиқ талабалар иштирок этган. Бу йил танлов 1 августдан 4 декабргача давом этади.
Honor Cup олтинчи маротаба ўз иштирокчиларга билимларини синаб кўриш, малакаларини ошириш, шунингдек Huawei компаниясидан имтиёзлар ва совғалар олиш имкониятини тақдим этмоқда. Танловга Россия, Беларусия, Қозоғистон, Ўзбекистон, Қирғизистон, Мўғулистон, Туркманистон, Грузия ва Озарбайжондан 2020 йилнинг олий ва ўрта махсус таълим муассасаларининг 18 ёшдан ошган талабалари, аспирантлари ва муассасалар битирувчилари таклиф этилади.
Ўзининг Евросиё минтақасидаги 20 йилдан ортиқ фаолияти давомида Huawei компанияси ҳар доим ўзи иш олиб бораётган мамлакатга кўпроқ фойда келтириш қоидасига амал қилиб келди. Шунингдек, «Ўзбекистонда, Ўзбекистон манфаати учун» концепциясига ва маҳаллийлаштириш тамойилига амал қилган ҳолда, компания Ўзбекистоннинг рақамли иқтисодиётини ривожлантириш учун АКТ соҳасида ўзбекистонлик мутахассислар билан ўз билим ва кўникмаларини баҳам кўришга интилмоқда.
Евросиё минтақасидаги Huawei компаниясининг вице-президенти У Сай шундай деди: «Honor Cup’нинг асосий мақсади – иштирокчиларни мустақил равишда ўрганишга, кейинчалик ўзлари инновацион лойиҳаларда қўллашлари мумкин бўлган янги билим ва малакаларни эгаллашларига қизиқтириш. Биз кадрлар тайёрлаш Евросиёда ягона рақамли ҳамжамиятни барпо этишдаги энг муҳим элементлардан бири деб ҳисоблаймиз. Honor Cup сингари кўрик-танловлар ёрдамида биз истеъдодли мутахассисларга нафақат жаҳон даражасидаги замонавий технологияларни ўрганишлари, балки уларнинг бу минтақадаги ҳар бир мамлакатнинг рақамли келажагини қўллаб-қувватлайдиган инновацион ечимларни яратишлари учун имконият беришга интиламиз».
Huawei компанияси танловга тайёргарлик кўришда, АКТнинг ҳозирги вақтда энг долзарб ва энг кўп талабга эга бўлган барча йўналишларини қамраб олишга интилмоқда. Шунинг учун номинациялар рўйхати ҳар йили ўзгариб туради. Бу йил иштирокчилар қуйидаги номинациялар бўйича ўз кучларини синаб кўришлари мумкин:
5G (янги авлод мобил алоқа технологиялари ва стандартлари) – номинация иштирокчиларнинг сўнгги йилларда ахборот-коммуникация технологияларининг энг тез ривожланаётган йўналишларидан бири бўлган мобил алоқа соҳасидаги билимларини синаб кўриш учун ўтказилади.
Cloud (сақлаш анд виртуализация технологиялари) – номинация иштирокчиларнинг булутли ҳисоблаш, булутли хизматлар, катта маълумотлар ва омборлар соҳасидаги билимларини синаб кўриш учун ўтказилади.
APP (мобил иловаларни ишлаб чиқиш) – номинация мобил иловалар дастурчиларининг ижодкорликка ва ўз профессионаллигини оширишга интилишларини рағбатлантириш учун ўтказилади.
HCIE (Huaweiнинг энг юқори даражадаги техник сертификати) – 2020 йилда HSIE сертификатлашдан ўтадиган IT мутахассислари учун ўтказилади.
IP (IP тармоқлари технологиялари ва протоколлари) – номинация иштирокчиларнинг бугунги кунда ҳар қандай ахборот турини узатиш учун асос ҳисобланадиган IP технологиялари ва IP тармоқларидаги ўзаро боғлиқ протоколлар соҳасидаги билимларини синаб кўриш ва ривожлантириш учун ўтказилади.
AI (Сунъий интеллект моделлари ва усуллари) – номинация иштирокчиларнинг сўнгги йилларда ахборот-коммуникация технологиялари доирасида кескин ривожланиши кузатилаётган сунъий интеллект билан боғлиқ технологиялар ва ечимлар соҳасидаги билимларини синаб кўриш учун ўтказилади.
Code (Спортга оид дастурлаш) – номинация иштирокчиларнинг алгоритмлар, маълумотлар тузилмалари бўйича билимларини ва улардан амалий масалаларни ҳал қилишда фойдаланиш кўникмаларини баҳолаш учун ўтказилади.
Махсус ICT Observer (Ахборот-коммуникация технологияларини шарҳловчи) номинацияси доирасида иштирокчиларга ахборот-коммуникация технологияларининг замонавий ривожланиши борасидаги ўзларининг қарашлари билан матн ва видео форматларида ўртоқлашиш таклиф этилади.
Танлов топшириқларига қўшимча равишда, «Honor Cup 2020» нинг барча иштирокчилари АКТнинг энг кўп талабга эга йўналишлари – мобил алоқа технологиялари, серверлар ва маълумотларни сақлаш учун булутли ечимлар, IP технологиялари ва IP тармоқларидаги ўзаро боғлиқ протоколлар, сунъий интеллект методлари каби йўналишлар бўйича Huawei мутахассислари томонидан ўтказиладиган ўқув видео-маърузалари тақдим этиладиган бепул онлайн-мактабга кириш имконияти берилади. Вебинарлар Huawei компанияси бугунги кунда иш олиб бораётган янги кейслар ва амалий технологиялар борасида талабалар ва битирувчиларнинг билимларидаги бўшлиқларни тўлдириш учун мўлжалланган ва улар иштирокчиларга танловга тайёргарлик кўришда ёрдам беради.
Мусобақанинг финал босқичи 4 декабрь куни Москвада бўлиб ўтади. Финалчиларга Huawei компанияси томонидан қимматбаҳо совғалар топширилади.
Эслатиб ўтамиз, 2019 йилда Honor Cup’нинг саралаш босқичларида Евросиё мамлакатларининг турли бурчакларидан келган 15000 дан ортиқ талабалар ва ёш дипломли мутахассислар иштирок этишди. 80 дан ортиқ иштирокчилар барча саралаш вазифаларини муваффақиятли бажара олишди ва Москвада бўлиб ўтган «Honor Cup 2019» финалида ҳал қилувчи синов учун учрашишди.
Кўрик-танлов халқаро даражада бўлиб ўтишини инобатга олган ҳолда, иштирокчилар рус тилини яхши билишлари шарт. Танловнинг ўтказилиш қоидалари ҳақидаги батафсил маълумотлар билан Huawei Uzbekistan телеграм каналида танишиб чиқиш ва иштирок этиш учун honorcup.ru расмий сайтида ариза бериш мумкин.
Реклама ҳуқуқи асосида.
Изоҳ (0)