АҚШнинг Ўзбекистондаги элчиси Дэниел Розенблюм журналист Бобомурод Абдуллаевнинг Бишкекда ҳибсга олингани ҳақидаги хабарлардан хавотирдалигини билдирди. Бу ҳақда «Gazeta.uz» хабар бермоқда.

Фото: «24.kg»

«Мен Қирғизистон расмийлари Ўзбекистон ҳукумати талабига биноан ўзбек журналисти Бобомурод Абдуллаевни ҳибсга олгани ҳақидаги хабарлардан қаттиқ хавотирдаман. Биз унинг ишини диққат билан кузатмоқдамиз», — деб ёзган у Twitter’даги саҳифасида.

Розенблюм икки мамлакат ҳукуматларини журналистнинг ҳаракат эркинлигини ҳурмат қилишга ва Қирғизистон орқали танланган жойга кетишига рухсат беришга чақирди.

«Президент Шавкат Мирзиёев ўтган йил декабрь ойида Конституция кунидаги нутқида ва ундан кейин ҳам оммавий ахборот воситалари эркинлиги ва журналистларнинг ҳуқуқлари тўғрисида бир неча бор сўзлаган. АҚШда эркин ва мустақил оммавий ахборот воситалари амалдаги демократиянинг ажралмас қисми эканлигига қўшилади», — деб таъкидлаган у.

Эслатиб ўтамиз, Бобомурод Абдуллаев 8 август куни Қирғизистон пойтахтида қўлга олинди. Ҳозирда журналистни Ўзбекистонга топшириш масаласи ҳал қилинмоқда. Бишкек суди уни 8 сентябргача ҳибсга олди.

11 августда Нью-Йоркдаги Журналистларни ҳимоя қилиш қўмитаси (CPJ) Қирғизистон ҳукуматига Бобомурод Абдуллаевни озод қилиш ва унинг эркин ишлашига шароит яратиш юзасидан мурожаат йўллаган.

Amnesty International Инсон ҳуқуқлари бўйича халқаро бирлашмаси (IPHR), Freedom House ва яна бошқа ҳуқуқ ҳимоячилари ташкилотлари Қирғизистон ҳукуматига Бобомурод Абдуллаевни экстрадиция қилмаслик юзасидан қўшма баёнот юборган.