Германиянинг Вилзек шаҳрида ҳарбий хизматни ўтаётган 19 ёшли америкалик аскар аэропорт автотураргоҳидаги Mercedes-Benz’ни ўғирлашга уринди. Йигитга ўйлаган режасини амалга оширишга машинанинг автомат узатмалар қутиси халал берган, деб хабар қилади Motor.

Фото: Stripes

АҚШга учиб кетишини кутиб ўтирган ҳарбий хизматчи немис аэропорти автотураргоҳидаги Mercedes-Benz калити билан қолдириб кетилганини пайқаб қолган. Автомобиль йўловчиларни кутиб ўтирган 50 ёшли таксичига тегишли бўлган. Mercedes эгасига эътибор бермаган аскар машина салонига кириб, уни ўт олдирган ва ҳайдашга уринган.

Бироқ ҳарбий хизматчи машинани тезда олиб қочишнинг уддасидан чиқмаган. Аскар немис седанининг автоматик трансмиссиясини қандай бошқаришни билмаган. Натижада узоқ мануляциядан кейин автомобиль қимирлашни бошлаган. Аскар машинани ҳаракатга келтирганида Mercedes эгаси буни пайқаб қолган ва йўловчи ўриндиғига ўтириб, уни тўхтатишга уринган.

Ҳайдовчи ва аскар ўртасида жанжал юзага келган, натижада ҳарбий хизматчи машинани орқага ҳайдаб юборган. Бироқ ҳарбий хизматчи узоққа кетишга улгурмаган, бир неча метрдан сўнг тўсиққа бориб урилган. Машина ўғриси автомобилни олиб кета олмаслигини англаб етгач, ундан тушиб қочишга уринган. Аммо бу ерда ҳам у омадсизликка учраган — аскарни маҳаллий полиция ходимлари қўлга олган.

Mercedes-Benz эгасининг сўзларига кўра, етказилган зарар 11 800 долларни ташкил этади. Аскар эса ўғирликда айбланиб, ҳарбий полицияга топширилган.