Беларусь Давлат хавфсизлик қўмитаси мамлакат президентлигига номзод Светлана Тихановскаяга нисбатан суиқасднинг олдини олди. Бу ҳақда ташкилот раҳбари Валерий Вакулчик маълум қилди, деб ёзмоқда Meduza.
Фото: «РБК»
Вакулчикнинг сўзларига кўра, Давлат хавфсизлик қўмитаси Тихановскаянинг штабидан унинг ҳаётига нисбатан хатар ҳақида хабар олган. Шунингдек, мамлакат Ички ишлар вазирлигининг экстремизм билан кураш йўналишига ҳам шу мазмунда хабар келиб тушган. Вакулчик хабарнинг жўнатувчиси аниқлангани ва у тез орада қўлга олинишини айтган.
ДХҚ раҳбарининг билдиришича, президент Александр Лукашенконинг топшириғига асосан Тихановскаянинг штабини қўриқлаш учун 120 киши жўнатилган.
Лукшенко 10 август куни эрталаб тайёрланаётган провокация ҳақида тезкор маълумот келганидан кейин Тихановскаянинг штаби қўриқловга олинганини маълум қилган.
Тихановскаянинг штаби эса намойишлар чоғида ҳимоя сўраб мурожаат қилмаганини билдирган.
Эслатиб ўтамиз, Беларусда 9 август куни президент сайлови бўлиб ўтди. Пойтахт Минскда президент сайловидан кейинги норозилик намойиши бошланган. Иштирокчиларини тарқатиб юбориш учун милициянинг махсус бўлинмаси резина ўқлардан фойдаланишга мажбур бўлган.
Беларусь Марказий сайлов комиссиясининг дастлабки ҳисоб-китобларига кўра, президентлик сайловларида республиканинг амалдаги раҳбари Александр Лукашенко 80,23 фоиз овоз тўплаган. Мухолифат номзоди Светлана Тихановская эса расмий маълумотларга кўра, 9,9 фоиз овоз олган.
Кейинроқ Светлана Тихановская ўтказилган сайловларда ўзини ғолиб дея ҳисоблашини маълум қилди ва Лукашенкога музокаралар ўтказиш таклифини берди. Шунингдек, у сайловларнинг натижаси юзасидан Марказий сайлов комиссиясига норозилик билдирди.
