Ўзбекистонда 2020/2021-ўқув йили магистрлар учун ҳам масофавий шаклда бошланади

Магистратура босқичи учун ўқиш жараёни масофавий шаклда йўлга қўйилади. Бу ҳақда Олий ва ўрта-махсус таълим вазири Иномжон Мажидов АОКАда Давлат тест маркази мутасаддилари билан ўтказилган матбуот анжуманида айтиб ўтган.

Шунингдек, вазир «Магистратура имтиҳонларида мутахассислик фанларидан тест бўлади деб эшитдим. Масалан, бизда 15 дан ортиқ мутахассислик фани бор. Уларнинг қайси биридан тест топширилади?», саволига изоҳ бериб ўтган.

«Ўқимаган фанлари бўлмаслиги аниқ. Топширилаётган магистратура мутахассислиги учун муҳим саналган 2-3 тадан ортиқ бўлмаган асосий ҳажмли фанлардан йиғилади. Кириш имтиҳонларининг тестларини таянч олий таълим муассасалари тузади».

Пандемия сабаб магистратура босқичига топширган абитуриентлар ўзининг ҳудудидан туриб пойтахтдаги ёки бошқа ҳудуддаги олий ўқув юртига имтиҳон топширишига рухсат борлиги ҳам қайд этилди.

«Ўзбекистон Президентининг 30 апрелда таълим бўйича ўтказган мажлисидаги қарорига мувофиқ магистратура босқичида тест сифатида мутахассисликларнинг хусусиятларини инобатга олиб, бакалавриат принципида айнан ўша олий ўқув юртига бориш эмас, қаерда бўлса, ўша ерда хоҳлаган институт ва йўналишига тест  топширишга иложи бўлади. Ҳозир бунинг дислокацияси бор, вақти аниқ бўлганида эълон қилинади», — дейди Мажидов.

Эслатиб ўтамиз, Шавкат Мирзиёевнинг 30 апрель, пайшанба куни, 2019/2020-ўқув йилини сифатли якунлаш, битирув ва кириш имтиҳонларини ташкил этиш масалалари муҳокамасига бағишланган йиғилишида ОТМлардаги битирув имтиҳонлари 2020 йилдан онлайн ўтказилиши ва кириш имтиҳонлари соддалаштирилиши маълум қилинган эди.