Хусусий тадбиркорлар юридик шахс ташкил этмасдан шуғулланиши мумкин бўлган фаолият турлари рўйхатига ўзгартириш киритилади. Ушбу ўзгариш ҳукуматнинг «Ўзбекистон Республикасида туризм соҳасини тиклаш ва ривожлантириш учун қулай шарт-шароитларни яратиш чора-тадбирлари тўгрисида»ги 2020 йил 10 июлдаги қарорида белгиланган.
Энди якка тартибдаги тадбиркорлар рўйхатдаги 37-бандга киритилаётган ўзгаришга мувофиқ хостел очиши мумкин. Бунгача мазкур бандга фақат «Оилавий меҳмон уйларини қонун ҳужжатларида белгиланган тартибда ташкил этиш» белгилаб қўйилганди ва энди ЯТТларга оилавий меҳмон уйлари ва хостелларни қонун ҳужжатларида белгиланган тартибда ташкил этишга рухсат берилди.
Якка тартибдаги тадбиркорлар энди туристик фаолият-турагентлик ва экскурсия хизматлари, шунингдек, гидлар (гид-таржимонлар), экскурсия етакчилари ва йўриқчи-йўл бошловчилар хизматларини кўрсатиши мумкин. Аввал рўйхатдаги 80-бандга кўра, фақат экскурсия хизматлари кўрсатиш бўйича туристик фаолиятга рухсат берилар эди.
Шунингдек, рўйхатга яна бир 86-банд қўшилмоқда ва унда туристларга уй-жойни қисқа муддатга ижарага бериш (30 кунгача) хизматини амалга ошириш ҳам рўйхатдаги фаолият турлари қаторига кирмоқда.
Июнь ойи бошида Бош вазир ўринбосари, Туризмни ривожлантириш давлат қўмитаси раиси Азиз Абдуҳакимов «Тикланиш йўли» халқаро онлайн туризм конференциясида Ўзбекистонда туризмнинг тикланиши уч босқичда амалга оширилишини маълум қилган. Кейинчалик, Шавкат Мирзиёев раислигида 2020 йил 16 июнь куни хизмат кўрсатиш ва ички туризм соҳаларини ривожлантириш масалалари бўйича видеоселектор йиғилишида ички туризм соҳасида 200 мингдан зиёд аҳолини иш билан таъминлаш мумкинлиги таъкидланганди.
20 июнда эса Ўзбекистонда даромадлари юқори ва академик ютуқлари кўп бўлган одамларни жалб қилиш учун икки ой ичида янги — Uzbekistan is my second home (Ўзбекистон — иккинчи уйим) иммиграцион виза тури ишлаб чиқилиши хабар қилинган.