Ўзбекистонда карантин чоралари босқичма-босқич бекор қилинади. Бу ҳақда Ўзбекистон Сенатининг 7 август куни очилган олтинчи ялпи мажлисида парламент юқори палатаси раиси Танзила Норбоева маълум қилди.
Унинг сўзларига кўра, «ҳозирги қийинчиликлар, албатта, ўтади, пандемия ҳам барҳам топади, бироқ келгусида бу каби синовлар бўлмайди, деб ҳеч ким кафолат бера олмайди».
«Эндиликда карантин чоралари босқичма-босқич бекор қилинади. Аҳоли ўртасида соғлом турмуш тарзи тўғрисидаги кенг тарғибот ишларини кучайтиришимиз, касалликка чалинганларни ишлаб чиқилган протоколлар асосида даволаш билан бирга нормал ҳаётга қайтаришимиз, яъни иқтисодиётимизни ривожлантиришимиз зарур», — деди сенат раиси.
Сенат раҳбари бундай шароитда қонунларни такомиллаштириш биринчи галдаги вазифалардан бири бўлишини маълум қилди.
Шунинг учун Танзила Норбоева Сенат қошида коронавирус пандемияси даврида юзага келган муаммолардан келиб чиққан ҳолда амалдаги қонунчиликни такомиллаштириш бўйича ишчи гуруҳ тузилганлигини айтиб ўтди. Ишчи гуруҳ сенаторлар, вазирликлар ва идоралар вакиллари, экспертлар ва олимлардан ташкил топиб, таҳлилларни ўтказади ва тегишли таклифларни ишлаб чиқади.
Олдинроқ Президент Шавкат Мирзиёев «қанчалик кўп карантинда ушласак, биз одамларни шунчалик кўп қийнаймиз» дея таъкидлаган эди. Давлат раҳбари коронавирус беморларининг барчаларини қамраб оладиган даволаш тизимини тез орада йўлга қўйишни буюрган эди.
Изоҳ (0)