Ўзбекистондаги 35 та университетда биринчи ўқув йили кредит-модул тизими асосида олиб борилади

Президент Шавкат Мирзиёев 6 август куни бу йил олий ўқув юртларига қабулни ташкил этиш ва 2020/2021-ўқув йилига тайёргарлик масалаларига бағишланган йиғилиш ўтказди.

Йиғилишда ўқув жараёнини юқори сифатли ўқув ресурслари билан бойитиш учун иқтидорли профессор-ўқитувчиларни жалб қилиш зарурлиги таъкидланди.

Олий ва ўрта махсус таълим вазирлиги 25 августгача барча 7 200 дан зиёд фан бўйича назарий ва амалий машғулотларнинг рақамли услубий таъминотини ва масофавий таълимга мослаштирилган ўқув дастурларини яратиши белгиланди.

Камида 35 та давлат университетларида биринчи ўқув йили кредит-модул тизимига мувофиқ ташкил қилиниши режалаштирилган.

«Тараққий этган давлатлар тажрибаси таълим даргоҳларини замон талабларига мослаштирмасдан илмий ва технологик ютуқларга эришиш қийин бўлишини кўрсатмоқда» – деди Президент Шавкат Мирзиёев.

Шу муносабат билан, бу йил Ўзбекистондаги камида 5 та университет нуфузли хорижий университетлар билан ҳамкорликда трансформация жараёнларидан ўтади. Шу билан бирга, ўқитишнинг тузилиши ва технологиялари яхшиланади, натижада университетлар замонавий таълим бериш ва инновацияларни жорий этишга қодир илмий муассасаларга айлантирилади.

Йиғилиш якунида давлат раҳбари республика миқёсидаги университетларнинг ректорлари билан шахсан суҳбатлашди, масъул шахсларга билдирилган муаммо ва таклифларни ҳал қилиш бўйича аниқ кўрсатмалар берди.

Аввал 2020/2021-ўқув йили учун кириш имтиҳонлари Тошкент шаҳри ва вилоят марказларининг очиқ марказий стадионларида бўлиб ўтиши ҳақида хабар берилган эди.