Ўзбекистон Транспорт вазирлиги туроператорлар томонидан ташкил этилаётган чартер рейслар нега қиммат эканини тушунтирди

Ижтимоий тармоқларда хориждаги фуқароларни Ўзбекистонга олиб келиш мақсадида ташкил этилаётган чартер авиарейслар чипталари хусусий компаниялар томонидан тўлиқ сотиб олинаётгани ва қиммат нархларда йўловчиларга сотилаётгани юзасидан турли хабарлар тарқалди.

Транспорт вазирлиги маълум қилишича, пандемия туфайли давлатлараро мунтазам авиақатновлар тўхтатилган ҳозирги вақтда хориждаги фуқароларни ватанга олиб келиш учун Республика махсус комиссияси томонидан тасдиқланган парвозлар жадвалига мувофиқ репатриацион рейслар ташкил этилмоқда.

Шунингдек, махсус комиссиянинг 7 июлдаги 33-сон баёнига мувофиқ, «Коронавирус пандемияси даврида Ўзбекистонга/Ўзбекистондан йўловчи ташиш бўйича халқаро авиаташувларни ташкил этиш тўғрисида» вақтинчалик тартиб тасдиқланган.

Мазкур тартибга мувофиқ, карантин даврини фақатгина меҳмонхоналарда ўтказиш шарти билан туроператорлар ёки авиакомпанияларнинг мурожаатига асосан Ўзбекистон фуқаролари ва Ўзбекистонда доимий яшаш жойига эга бўлган фуқаролиги бўлмаган шахсларни санитария-эпидемиология талабларига қатъий риоя қилган ҳолда олдиндан фуқароларни меҳмонхонагача кузатув ва меҳмонхонада жойлаштириш хизматларини ташкил қилиш ҳисобига республиканинг барча халқаро аэропортлари орқали етказиб келиш бўйича чартер қатновларини ташкил қилишга рухсат берилган.

Бундай тижорий парвозларнинг амалга оширилиши ҳам бевосита Республика махсус комиссияси билан келишилган ҳолда амалга оширилади. Бунда Туризмни ривожлантириш давлат қўмитаси туроператорлар томонидан мамлакатга олиб келинаётган йўловчиларнинг карантин қоидаларига қатъий риоя қилган ҳолда меҳмонхонага жойлаштирилишини тўлиқ назорат қилади. Туроператорлар томонидан аэропорт ва чегара ўтказиш пунктлари орқали ташкил қилинаётган ташиш ва 10 кунлик карантинга жойлаштириш хизматлари учун тўловлар олдиндан келишилиши белгиланган.

«Туроператорлар ва авиакомпаниялар томонидан ташкил этилаётган чартер қатновларининг Республика махсус комиссияси томонидан тасдиқланган парвозлар жадвалига мувофиқ ташкил этилаётган репатриацион рейсларга алоқаси йўқ», — дейилади Транспорт вазирлиги баёнотида.

Туроператорлар ва авиакомпаниялар томонидан ташкил этилаётган чартер рейсларининг нисбатан қимматлиги қуйидаги омиллар билан боғлиқ:

• қатнов амалга оширилаётган давлатнинг талаби билан аксарият ҳолларда парвознинг бир томонга бўш (йўловчиларсиз) амалга оширилаётгани;
• самолётларнинг ижара пули;
• йўналиш масофаси ва нечта давлатлар ҳаво кенглик ҳудудларидан учиб ўтиши;
• аэронавигацион хизматлар;
• аэропорт ерусти хизматлари ва йиғимлари;
• олиб келинган йўловчиларни аэропорт ҳудудидан меҳмонхонага транспортда етказиб қўйиш;
• меҳмонхонада карантин қоидаларига риоя этган ҳолда бўлишни назорат қилишни ташкил этиш;
• тиббий ва санитария хизмати харажатлари;
• ПЗР тест синамаларини олиш қиймати ва бошқа молиявий харажатлар.