Соғлиқни сақлаш вазирлиги ўзида коронавируснинг ҳар қандай аломатини сезган фуқаролар саралаш ва тақсимлаш марказларига мурожаат қилишлари мумкинлигини маълум қилди.
Фото: Тошкент шаҳар ҳокимлиги матбуот хизмати
Тошкентда коронавирус инфекциясига гумон қилинган ёки касалланган беморларга тезкорлик билан малакали тиббий ёрдам кўрсатиш мақсадида Давлат хавфсизлик хизмати, Мудофаа вазирлиги, Ички ишлар вазирлиги, Соғлиқни сақлаш вазирлиги ва Тошкент шаҳар ҳокимлиги томонидан 4 та саралаш ва тақсимлаш марказлари ташкил қилинган.
Улар:
- 814 ўринли «Ўзэкспомарказ» 1—2 павильони (Юнусобод тумани, Амир Темур шоҳ кўчаси, 107-уй);
- 1 000 ўринли «Ўзэкспомарказ» 3—4 павильони (Юнусобод тумани, Амир Темур шоҳ кўчаси, 107-уй);
- 750 ўринли «Универсал» спорт мажмуаси (Юнусобод тумани, Корхожиота кўчаси, 2А-уй);
- 520 ўринли «Ёшлик» спорт мажмуаси (Шайхонтоҳур тумани, Пахтакор кўчаси, мўлжал: «Пахтакор» метро бекати).
Таъкидланишича, бу ерда коронавирус инфекциясига чалинган беморларга сифатли ёрдам кўрсатиш учун барча шароитлар яратилган.
Ўзида COVID-19 аломатларини сезган ёки бу касалликка чалинган фуқаролар ушбу масканларга уч йўл билан, яъни :
- тез тиббий ёрдам машинасида;
- оилавий поликлиника қошидаги мобил бригада ёрдамида;
- ўзлари боришлари мумкин бўлади.
Ушбу марказларга мурожаат қилган ҳар бир беморга шифокорлар томонидан малакали тиббий ёрдам кўрсатилмоқда. Борди-ю, касаллик енгил, аломатларсиз кечаётган бўлса, бундай беморларга керакли дори воситалари ва тавсиялар берилиб, улар уйда даволашга ўтказилмоқда.
Саралаш ва тақсимлаш марказларида жами 3084 та ўрин ташкил қилинган. Ушбу марказлар ўз фаолиятини бошланганидан буён 3777 нафар бемор мурожаат қилган бўлиб, шундан 2688 нафари ётқизилган, 1336 нафари эса соғайиб, уйларига юборилган.
Ҳозирда COVID-19 билан касалланган беморларни саралаш ва тақсимлаш марказларида 1843 та бўш ўрин мавжуд.
Ушбу марказларга жойлашиш билан боғлиқ саволлар бўлса, Соғлиқни сақлаш вазирлигининг 1003 қисқа рақамли Call-марказига мурожаат қилиш мумкин.
Аввалроқ Зангиота санаторийси коронавирусга чалинган беморларни даволаш комплексига айлантирилгани, Урганч шаҳрида коронавирус юқтириб олган беморларни даволаш учун 708 ўринли махсус марказлар ташкил этилгани ҳақида хабар берилган эди. Бундан ташқари, Учтепа туманида жойлашган Atlas мебель марказида коронавирусга қарши кураш доирасида навбатдаги тақсимлаш маркази ташкил этилаётгани хабар қилинган эди.
