Фарғона вилояти соғлиқни сақлаш бошқармаси бошлиғи Одилжон Умаров вилоятда коронавирус билан касалланганларга оид статистика камайтириб кўрсатилаётгани тўғрисидаги хабарларни асоссиз деб атади. Бу ҳақда ЎзА хабар берди.
«Ҳеч кимга сир эмаски, бугунги кунда аҳоли орасида коронавирус инфекцияси билан касалланиш ҳолатлари ортиб бормоқда. Шунингдек, инфекцияга чалинганлар тўғрисидаги статистика яширилаётгани тўғрисида миш-мишлар тарқамоқда. Бу мутлақо асоссиз. Ҳар бир бемор ва инфекцияга чалинишда гумонланаётган фуқаро вилоят ҳокимлиги қошидаги коронавирусга қарши курашиш штаби томонидан текширилмоқда. Бу нима учун амалга оширилмоқда? Касалликни қанча эрта аниқласак, инфекция тарқалишининг олдини шунча тезроқ олишимиз мумкин», — дейди Одилжон Умаров.
Фарғона вилоятида коронавирус билан касалланиш бўйича биринчи ҳолат 22 март куни қайд этилган. Соғлиқни сақлаш вазирлиги маълумотларига кўра, 2 август ҳолати бўйича вилоятда касаллар сони 269 кишини ташкил этмоқда, уларнинг 255 нафари — соғайган, бир бемор вафот этган, ҳозирда 14 киши даволанмоқда.Уй шароитида коронавирусдан даволанаётган беморлар статистикасидан (Соғлиқни сақлаш вазирлиги томонидан бир маротаба эълон қилинган) Фарғона вилояти ўрин олмаган.
Яқинда Фарғона вилояти ҳокими Шуҳрат Ғаниев вилоятида коронавирусга чалинган беморлар учун 12 600 та захира койка-ўринлар тайёрлаб қўйилганини маълум қилганди.
Аввалроқ Фарғонада 15 минг кишига коронавирусга қарши бепул дори-дармон ва ҳимоя воситалари тарқатилгани тўғрисида хабар берилганди. Маълумотларга кўра, махсус дори қутиларида бактерия ҳамда вирусларга қарши, иммунитетни кўтарувчи 21 турдаги дори воситалари, витаминлар, тиббий ниқоблар ва антисептик геллар жамланган. Дори-дармон ва тиббий буюмларнинг уч ойлик захирасини яратиш учун вилоят бюджетининг орттириб бажарилган қисмидан 10 миллиард сўм маблағ ажратилган.
Изоҳ (0)