Январь ойи бошида хато туфайли уриб туширилган Украина халқаро авиакомпаниясининг Boeing 737-800 йўловчи самолёти учун Эрон товон тўлайди. Бу ҳақда мамлакат ташқи ишлар вазирлигининг расмий вакили Аббос Мусавийга таяниб «РБК» хабар берди.

Фото: «РИА Новости»

«Эрон самолёт учун товон пули тўлашга рози бўлди, аммо бу жараён узоқ давом этади ва турли хил техник ҳамда ҳуқуқий жиҳатларни ўз ичига олади», – деди Мусавий.

У товон пули тўлаш масаласида музокаралар давом этаётганини маълум қилди ва алоҳида таъкидлаб ўтдики, Теҳрон уриб туширилган самолёт учун жавобгарликни ўз бўйнига олди.

Маълумот учун, Эрон ислом инқилоби муҳофизлари корпусининг «Ал-Қудс» махсус бўлинмаси генерали Қосим Сулаймоний 3 январь куни АҚШ ҳаво кучлари томонидан Бағдод аэропортига берилган авиаҳужум оқибатида ўлдирилганди. Зарба АҚШ президенти Дональд Трамп фармойишига асосан берилган. 8 январь куни эса Эрон унга жавобан Ироқдаги Америка базасига ҳужум қилган.

Ҳужум вақти ракеталарнинг бири Украина халқаро авиакомпаниясининг Теҳрондан Киевга учаётган Boeing 737 самолётига тегиб, уни уриб туширилган. Самолёт бортида 176 киши вафот этган.

Эрон дарҳол авиаҳалокатга техник носозлик сабаб бўлганини айтган. Кейинчалик, 11 январь куни Эрон мамлакат ҳаво мудофааси самолётни операторнинг хатоси туфайли уриб туширилганини тан олди ва ҳалок бўлганларнинг оила аъзоларига компенсация тўлашини маълум қилди. Январь ойи охирида Эрон ташқи ишлар вазири Муҳаммад Жавод Зариф самолётни тасодифан уриб туширган аскар қамоқда эканини айтган.