«Ўзэкспомарказ»даги Тақсимлаш маркази иш фаолияти, шифокорларнинг у ердаги иш жараёни, коронавирус инфекциясига гумон қилинган беморлар учун яратилган шароитлар ҳақидаги лавҳа UzReport телеканалида эфирга берилди.

Фото: Тошкент шаҳар ҳокимлиги

Мутахассислардан бири Тақсимлаш марказида айни пайтда 300 нафар бемор борлиги, ушбу марказда реанимация бўлимини очиш режалаштирилаётганини маълум қилган.

«Шунингдек, «Ўзэкспомарказ»да COVID-19’га чалинган беморлар учун ташкил этилган тақсимлаш марказида катта монитор ўрнатилган. Тақсимлаш марказидаги беморларнинг яқинлари ва қариндошлари хавотирга берилмай ичкарида рўй бераётган вазиятдан монитор орқали хабардор бўлиши мумкин», – дейилади Тошкент шаҳар ҳокимлиги ахборот хизматининг хабарида.

«Ўзэкспомарказ»да жойлашган тиббиёт марказида бемор кўрикдан ўтказилиб, аҳволи оғир беморлар барча шароитлар, хусусан, кислород таъминотига эга шифохоналарга йўналтирилади. Ўртача оғирликдаги беморларга амбулатор шароитда муолажалар тавсия қилинади. Касалликни енгил шаклда бошдан кечираётганлар эса уй шароитида шифокор назорати остида даволанади. Бу тиббиёт тизимига тушаётган босимни пасайтиради.

«Марказда 250 нафар тиббиёт мутахассиси фаолият юритиши режалаштирилганди. Ҳокимлик ташаббуси билан яратилган марказга шаҳарнинг турли ҳудудларидан COVID-19’га гумонланган фуқаролар олиб келинмоқда», – дея қўшимча қилинган хабарда.

Аввал Тошкент шаҳар Шайхонтоҳур туманидаги «Ёшлик» спорт мажмуаси коронавирус ташхиси қўйилган беморларни даволаш учун махсус марказга айлантирилиши хабар қилинган, бунга қадар Юнусобод туманидаги «Ўзэкспомарказ» кўргазмалар мажмуасининг павильонларида коронавирусга гумон қилинган ва касалланган беморларни тақсимлаш маркази ташкил қилиниб, у ерга ҳам тиббиёт ходимлари ишга қабул қилинган ва марказ ўз фаолиятини бошлаганди.

Бундан ташқари, Сергели туманидаги болалар ва ўсмирлар спорт мактаби ҳудудида коронавирусга гумон қилинганларга ташхис қўйиш, заруратга кўра даволаш учун шароит яратилган.

Шу билан бирга, Тошкентда коронавирусга гумон қилинганлар ва касалланганларга ёрдам кўрсатадиган ва тун-у кун ишлайдиган 10 та махсус клиника ташкил қилинди.