Монополияга қарши курашиш қўмитаси ҳукумат топшириғи ҳамда фуқаролардан ёзма ва оммавий ахборот воситалари орқали келиб тушган мурожаатларни инобатга олган ҳолда UzAuto Motors’да Ўзбекистон Республикаси «Рақобат тўғрисида»ги қонуни ва соҳани тартибга солувчи қонунчилик ҳужжатлар талабларига риоя этилиши, шу жумладан, ишлаб чиқарилаётган енгил автомобиллар таннархи шаклланиши ва нарх қўлланилиши асослилиги юзасидан ваколат доирасида текшириш ўтказди. Бу ҳақда қўмита ахборот хизмати хабар берган.

Фото: «Дарё»

Қайд этилишича, текшириш натижалари бўйича UzAuto Motors томонидан «Рақобат тўғрисида»ги қонуннинг тегишли моддаси талаблари бузилиши аломатлари аниқланиб, белгиланган тартибда иш қўзғатилган.

UzAuto Motors’га нисбатан қўзғатилган иш бўйича Монополияга қарши курашиш қўмитасининг махсус комиссияси томонидан тегишли қарор қабул қилинганидан сўнг натижаси бўйича қўшимча ахборот тақдим этилади», – дейилади хабарда.

2020 йил 10 июлда Монополияга қарши курашиш қўмитаси Akfa университетига оид Президент қарори лойиҳаси «Рақобат тўғрисида»ги қонунга зидлигини билдирган. Ундан аввал Монополияга қарши курашиш қўмитаси Ўзбекистонда қатор корхоналарга эксклюзив имтиёзлар бериш ҳуқуқини бекор қилишни кўзда тутувчи Президент фармони лойиҳасини муҳокамага қўйган. Фармон лойиҳасида Akfa университетига берилган солиқ ва божхона имтиёзларини бекор қилиш кўзда тутилганди.

Шунингдек, 20 июлда «Ўзметкомбинат» юқоридаги фармон лойиҳасига кўра металл парчаларини тайёрлаш бўйича монополияси бекор қилинишига қарши чиққани ва Монополияга қарши курашиш қўмитаси ушбу муносабатга батафсил жавоб қайтаргани хабар қилинган.