Тошкентда йўловчининг iPhone Х ва Airpods’ини олиб қўйиб, ўзини кўчада қолдирган ҳайдовчи ҳамда унинг шериги қўлга тушди
Тошкент шаҳрида 16 ёшли С.А.ни манзилига элтиб қўйиш учун тўхтаб, тунда кўчада қолдириб кетган ва унинг iPhone Х телефонини ўғирлаган ҳайдовчи қўлга тушди. Бу ҳақда ИИВ ҳузуридаги Тергов департаменти хабар қилди.
2020 йилнинг 17 июль куни соат 20:30 да вояга етмаган 16 ёшли С.А. Мирзо Улуғбек туманидаги уйига бориш учун Яшнобод тумани Махтумқули кўчасидан таксига ўтирган. Lacetti Яшнобод тумани Тошкент ҳалқа автомобиль йўлида тўхтаган ҳайдовчи орқа ўриндиқда ўтирган С.А.нинг 5 миллионлик iPhone Х телефони ва 1,5 миллион сўмлик Airpods 2 қулоқчинини очиқдан очиқ талон-торож қилиб машинадан тушириб қолдирган.
Суриштирув ишлари натижасига кўра, мазкур жиноятни 31 ёшли М.Т. ва Э.Т. содир этгани аниқланган. М.Т.дан iPhone Х ва Airpods 2 наушниклари ашёвий далил сифатида расмийлаштириб олинган.
Ҳолат юзасидан Яшнобод туман бўйича ИИО ФМБ ҳузуридаги Тергов бўлими томонидан Ўзбекистон Республикаси Жиноят кодексининг 166-моддаси 2-қисми «в» банди (Талончилик) билан жиноят иши қўзғатилиб, М.Т. ва Э.Т. гумон қилинувчи тариқасида ишга жалб қилинган ҳамда процессуал тартибда ушланган, дейилади департамент хабарида.
Аввал 6 июлда Бухорода машинада маст ҳолатда ухлаб қолган аёлнинг 1 миллион сўмлик телефонини ўғирлаган ўқувчи қиз жаримага тортилгани, июнь ойида эса «Абу Сахий» очилиши арафасида бозордаги дўкондан салкам 30 миллион сўмлик телефонлар ўғирлаб кетилгани, Андижонда 21 ёшли келинчак ўз уйидаги пулни, қўшнисининг уйидан планшет ва пулларни ўғирлагани ҳақида хабарлар берилган эди.
