Toshkent shahrida 16 yoshli S.A.ni manziliga eltib qo‘yish uchun to‘xtab, tunda ko‘chada qoldirib ketgan va uning iPhone X telefonini o‘g‘irlagan haydovchi qo‘lga tushdi. Bu haqda IIV huzuridagi Tergov departamenti xabar qildi.
2020-yilning 17-iyul kuni soat 20:30 da voyaga yetmagan 16 yoshli S.A. Mirzo Ulug‘bek tumanidagi uyiga borish uchun Yashnobod tumani Maxtumquli ko‘chasidan taksiga o‘tirgan. Lacetti Yashnobod tumani Toshkent halqa avtomobil yo‘lida to‘xtagan haydovchi orqa o‘rindiqda o‘tirgan S.A.ning 5 millionlik iPhone X telefoni va 1,5 million so‘mlik Airpods 2 quloqchinini ochiqdan ochiq talon-toroj qilib mashinadan tushirib qoldirgan.
Surishtiruv ishlari natijasiga ko‘ra, mazkur jinoyatni 31 yoshli M.T. va E.T. sodir etgani aniqlangan. M.T.dan iPhone X va Airpods 2 naushniklari ashyoviy dalil sifatida rasmiylashtirib olingan.
Holat yuzasidan Yashnobod tuman bo‘yicha IIO FMB huzuridagi Tergov bo‘limi tomonidan O‘zbekiston Respublikasi Jinoyat kodeksining 166-moddasi 2-qismi “v” bandi (Talonchilik) bilan jinoyat ishi qo‘zg‘atilib, M.T. va E.T. gumon qilinuvchi tariqasida ishga jalb qilingan hamda protsessual tartibda ushlangan, deyiladi departament xabarida.
Avval 6-iyulda Buxoroda mashinada mast holatda uxlab qolgan ayolning 1 million so‘mlik telefonini o‘g‘irlagan o‘quvchi qiz jarimaga tortilgani, iyun oyida esa “Abu Saxiy” ochilishi arafasida bozordagi do‘kondan salkam 30 million so‘mlik telefonlar o‘g‘irlab ketilgani, Andijonda 21 yoshli kelinchak o‘z uyidagi pulni, qo‘shnisining uyidan planshet va pullarni o‘g‘irlagani haqida xabarlar berilgan edi.
Izoh (0)