Ўзбекистон Ташқи ишлар вазирлиги Қозоғистон билан чегарадаги Ғишт кўприк чегара пости яқинида тўпланиб турган 3,7 мингдан ортиқ ўзбекистонлик чегарадан ўтказилганини маълум қилди.

Фото: Tengrinews

Аввалроқ 1 июлдан 7 июлгача бўлган муддатда Жибек жоли—Ғишт кўприк назорат-ўтказиш пункти орқали 2700 нафардан ортиқ фуқаро Ўзбекистонга қайтган эди. Бироқ юзага келган техник муаммолар туфайли Қозоғистон—Ўзбекистон чегарасидан юртдошларни ўтказиш чекланган миқдорда амалга оширилган. Оқибатда бу ҳолат чегарада 3000 дан ортиқ Ўзбекистон фуқаролари тўпланиб қолишига сабаб бўлган.

«Республика махсус комиссияси, ДХХ Чегара қўшинлари ва Ўзбекистоннинг Қозоғистондаги дипломатик ваколатхоналарининг биргаликдаги саъй-ҳаракатлари натижасида 8 июль куни фуқароларимизнинг Қозоғистон—Ўзбекистон чегарасидан эркин ўтишига тўсқинлик қилувчи барча техник ва ташкилий масалалар тезкорлик билан ҳал қилинди», — дейилади хабарда.

Ўзбекистон Ташқи ишлар вазирлиги Оператив штаби маълумотларига кўра, 8 июль куни кечқурун ва 9 июль куни Жибек жоли—Ғишт кўприк назорат-ўтказиш пунктидан 3746 нафар фуқаро ўтказилган.

«Ҳозирги пайтда давлатлараро чегарани кесиб ўтишда муаммолар йўқ, назорат-ўтказиш пунктлари одатдагидек ишламоқда, фуқароларнинг тўпланиб қолиши кузатилмаяпти», — дейилади вазирлик маълумотида. Эндиликда Ўзбекистонга қайтиб келган фуқаролар Республика махсус комиссияси томонидан белгиланган талабларга қатъий риоя қилган ҳолда 14 кунлик карантинга жойлаштирилади.

Эслатиб ўтамиз, 7 июлда Қозоғистон билан чегарани кесиб ўтиш учун Самарада яна 1,2 минг ўзбекистонлик тўплангани, кейинчалик Ўзбекистонга қайтиш учун Россия—Қозоғистон чегарасида 2000 дан ортиқ фуқаро тўплангани ҳақида хабар берилган. Президент Шавкат Мирзиёев 8 июль кунги видеоселекторда коронавирус пандемияси ва кучайтирилаётган карантин масаласида халққа мурожаат қилиб, «чет элда қолган фуқаролар, албатта, олиб келиниши»ни маълум қилганди.