O‘zbekiston Tashqi ishlar vazirligi Qozog‘iston bilan chegaradagi G‘isht ko‘prik chegara posti yaqinida to‘planib turgan 3,7 mingdan ortiq o‘zbekistonlik chegaradan o‘tkazilganini ma’lum qildi.
Avvalroq 1-iyuldan 7-iyulgacha bo‘lgan muddatda Jibek joli—G‘isht ko‘prik nazorat-o‘tkazish punkti orqali 2700 nafardan ortiq fuqaro O‘zbekistonga qaytgan edi. Biroq yuzaga kelgan texnik muammolar tufayli Qozog‘iston—O‘zbekiston chegarasidan yurtdoshlarni o‘tkazish cheklangan miqdorda amalga oshirilgan. Oqibatda bu holat chegarada 3000 dan ortiq O‘zbekiston fuqarolari to‘planib qolishiga sabab bo‘lgan.
“Respublika maxsus komissiyasi, DXX Chegara qo‘shinlari va O‘zbekistonning Qozog‘istondagi diplomatik vakolatxonalarining birgalikdagi sa’y-harakatlari natijasida 8-iyul kuni fuqarolarimizning Qozog‘iston—O‘zbekiston chegarasidan erkin o‘tishiga to‘sqinlik qiluvchi barcha texnik va tashkiliy masalalar tezkorlik bilan hal qilindi”, — deyiladi xabarda.
O‘zbekiston Tashqi ishlar vazirligi Operativ shtabi ma’lumotlariga ko‘ra, 8-iyul kuni kechqurun va 9-iyul kuni Jibek joli—G‘isht ko‘prik nazorat-o‘tkazish punktidan 3746 nafar fuqaro o‘tkazilgan.
“Hozirgi paytda davlatlararo chegarani kesib o‘tishda muammolar yo‘q, nazorat-o‘tkazish punktlari odatdagidek ishlamoqda, fuqarolarning to‘planib qolishi kuzatilmayapti”, — deyiladi vazirlik ma’lumotida. Endilikda O‘zbekistonga qaytib kelgan fuqarolar Respublika maxsus komissiyasi tomonidan belgilangan talablarga qat’iy rioya qilgan holda 14 kunlik karantinga joylashtiriladi.
Eslatib o‘tamiz, 7-iyulda Qozog‘iston bilan chegarani kesib o‘tish uchun Samarada yana 1,2 ming o‘zbekistonlik to‘plangani, keyinchalik O‘zbekistonga qaytish uchun Rossiya—Qozog‘iston chegarasida 2000 dan ortiq fuqaro to‘plangani haqida xabar berilgan. Prezident Shavkat Mirziyoyev 8-iyul kungi videoselektorda koronavirus pandemiyasi va kuchaytirilayotgan karantin masalasida xalqqa murojaat qilib, “chet elda qolgan fuqarolar, albatta, olib kelinishi”ni ma’lum qilgandi.
Izoh (0)