Президентнинг 2020 йил 3 июлдаги тегишли қарорларига асосан, соғлиқни сақлаш вазирининг ўринбосарлари лавозимига Элмира Боситхонова, Улуғбек Собиров, Шоҳрух Шораҳметов ҳамда Абдулла Азизов тайинланган. Бу ҳақда Соғлиқни сақлаш вазирлиги Жамоатчилик билан алоқалар бўлими хабар қилди.

Фото: «Дарё»

Элмира Боситхонова 1958 йилда туғилган. 1981 йилда Тошкент давлат тиббиёт институти (ҳозирги Тошкент тиббиёт академияси)ни тамомлаган, тиббиёт фанлари доктори.

Тошкент шаҳар тез тиббий ёрдам клиник шифохонасида фаолиятини бошлаган ва кўп йиллар бош шифокор сифатида, шунингдек, Ўзбекистон Республикаси бош вазири ўринбосари, Хотин-қизлар қўмитаси раиси, сўнг соғлиқни сақлаш вазири ўринбосари лавозимларида фаолият кўрсатган. Айни пайтга қадар маҳалла ва оилани қўллаб-қувватлаш вазирининг биринчи ўринбосари лавозимида фаолият юритиб келаётганди.

Улуғбек Собиров.

Фото: Соғлиқни сақлаш вазирлиги

Улуғбек Собиров 1974 йилда туғилган. 1997 йилда Тошкент давлат иккинчи тиббиёт институти (ҳозирги Тошкент тиббиёт академияси)нинг даволаш иши мутахассислиги бўйича тамомлаган, тиббиёт фанлари доктори.

Дерматология ва венерология илмий текшириш институтида турли лавозимларда ишлаган. 2013 йилдан айни пайтга қадар Республика ихтисослаштирилган дерматология ва косметология илмий-амалий тиббиёт маркази директори лавозимида самарали фаолият юритиб келаётганди.

Шоҳрух Шораҳметов.

Фото: Соғлиқни сақлаш вазирлиги

Шоҳрух Шораҳметов бошқа ишга ўтган Баҳодир Низомов ўрнини эгаллаган.

У 1977 йилда туғилган. 1998 йилда Тошкент давлат иқтисодиёт университетини, 1999 йилда эса Буюк Британиянинг Эксетер университетини иқтисодчи, молия ва инвестициялар мутахассислиги бўйича тамомлаган.

Тайинловга қадар молия вазири ўринбосари лавозимида фаолият кўрсатиб келаётганди.

Абдулла Азизов.

Фото: Соғлиқни сақлаш вазирлиги

Абдулла Азизов 1981 йилда туғилган. 2003 йилда Япониянинг Нагоя университетини, 2004 йилда Жаҳон иқтисодиёти ва дипломатия университетини тамомлаб, молия ва халқаро бизнес йўналиши бўйича магистр даражасини олган.

Шунингдек, Даниянинг Орхус университети магистратурасини, Орхус техника коллежини IT-дастурчи мутахассислиги бўйича тамомлаб, ушбу йўналишда фаолиятини бошлаган.

Тайинловга қадар, 2006—2019 йилларда Данияда қатор нуфузли компанияларда масъул лавозимларда ишлаган. 2019 йил сентябрь ойидан айни пайтга қадар Ўзбекистон Республикаси Давлат солиқ қўмитаси раиси ўринбосари лавозимида самарали фаолият юритиб келаётганди.