Андрей Канчельскис «Навбаҳор» стадиони майсасининг ҳолати ҳақида: Шунчаки шармандали

Футбол бўйича Coca-Cola Суперлига 7-туридан ўрин олган «Навбаҳор» — «Сўғдиёна» учрашувидан (2:0) сўнг матбуот анжумани бўлиб ўтди.

Дастлаб меҳмонлар устози Улуғбек Бақоев ўз фикрлари билан ўртоқлашди.

«Биринчи бўлимда ўз имкониятларимиздан фойдалана олмадик, иккинчи бўлимда рақиб ўз имкониятларидан фойдаланди ва ғалаба қозонди.

Шахсий фикримча, омад эмас, балки рақиб футболчиларнинг маҳорати эвазига ютқаздик. Йигитларга эътирозим йўқ, улар ҳаракат қилди, шунчаки гол ура олмадик. Натижадан табиийки қониқмадим, ғалаба учун ўйнадик. Йигитларнинг интилишларидан қониқдим, аммо натижадан эмас.

«Сўғдиёна» Наманганда ҳеч қачон юта олмаган ва яна мағлуб бўлди? Тўғриси буни билмагандим.

«Навбаҳор» бу йил медаллар учун курашади деб ўйлайман. Кубокда камида финалга чиқа олади. Жамоа сафида яхши футболчилар жамланган ва бу ерда кучли мураббий ишламоқда», — дея Бақоевнинг сўзларидан келтирмоқда «Championat.asia».

Матбуот анжуманининг иккинчи қисмида Андрей Канчельскис ўз фикрларини билдирди.

«Оғир ўйин. «Сўғдиёна» биздан бир кун кўпроқ дам олгани барибир ўз сўзини айтди. Футболда майда нарсалар бўлмайди.

Клубдагилар «Навбаҳор» учун ишлайдими ёки қаршими? Айтинглар, стадионимиз директори майдонни нима қилди? Майса қайсидир жойда ўрилган, қайсидир жойда ўрилмаган... Яна жарима майдонимизга сув қуйишган, Ўткир «бассейн»да чўмилиб олди. Бу шармандали ҳолат!

Ўйинга келсак, йигитларга раҳмат, хоҳиш кучли бўлди. Кейинги турда «Бунёдкор»га қарши ўйнаймиз. Ўтган йил улар бизни икки бор ранжитганди. Яхши жамоа, унга қарши ўйин учун ҳозирдан бошлаб тайёргарлик кўрамиз.

Агар ўйин 45 дақиқа давом этганида биз 45 дақиқага тайёргарлик кўрардик. Ҳозир 90 дақиқага тайёрланаяпмиз. Қайси дақиқада гол уришнинг фарқи йўқ. Рақиб футболчиларида куч қолгунича қаршилик кўрсатади.

Иккинчи давра олдидан таркиб кучайтириладими? Ўша пайтга етиб олайлик, ҳозирча мана шу йигитлар билан ўйнаймиз. Ҳар куни пандемия туфайли янги хабарлар чиқмоқда. Ҳали таркибимиздаги барча футболчиларга тўлиқ имконият берилмади ва биз янгилар ҳақида ўйлаяпмиз. Бу нотўғри», — дейди россиялик мутахассис.

Мазкур ўйиндаги ғалабадан сўнг «Навбаҳор» очколарини 14 тага етказиб олган ҳолда, 4-ўринга кўтарилди. «Сўғдиёна» (8) эса 9-поғонада қолди.