Шота Арвеладзе «Сурхон»га қарши ўйин ҳақида: Ҳамма зарбалар голга айланаверса, ўйин қизиқ бўлмасди

Футбол бўйича Coca-Cola Суперлига 7-туридан ўрин олган «Пахтакор» — «Сурхон» учрашувидан (3:1) сўнг матбуот анжумани бўлиб ўтди.

Матбуот анжуманининг илк қисмида «Сурхон» техник директори Григорий Сейтлин қатнашди.

«Ўйин менга ёқди. Ҳар икки жамоа чиройли ўйин кўрсатди. Иккинчи бўлимда рақиб жамоа яхшироқ ўйнади. «Пахтакор»ни ғалаба билан табриклаймиз. Уларга қарши ўйнаш осон эмаслиги боис иккинчи рақам билан ўйнадик. Ўйиндаги ҳисобни биз очдик. Ёш болаларча хатолар туфайли кетма-кет иккита гол ўтказиб юбордик. Захирадан майдонга тушган Шайдулов чап қанотда яхши ўйин кўрсата олди.

Владимир Андреев жамоа билан ишлашда давом этадими? Албатта, у мураббий сифатида жамоа билан ишлашда давом этади. Регламентга кўра, бош мураббий про-лицензиясига эга бўлиши лозим, Андреев эса А лицензияга эга. Алоҳида айтиш лозим, тез орада жамоага про-лицензиясига эга мураббий тайинланади», — дейз Сейтлиннинг сўзларидан иқтибос келтирмоқда «Championat.asia» .

Шундан сўнг «шерлар» устози Шота Арвеладзе ўйин ҳақидаги фикрларини билдириб ўтди.

«Ўйин яхши ўтди, рақиб ҳимоядан тўп тепди ва қарши ҳужумда ўйнашга уринди. Биз ўйинда тўлиқ назоратни қўлга олдик. Айниқса, дастлабки 20 дақиқада гол уришимиз мумкин эди. Пенальтидан гол ўтказиб юбордик. Ҳайриятки, чиройли комбинациялар эвазига кетма-кет иккита гол уришга эришдик. Ўйлайманки, ҳақли ғалабага эришдик.

«Сурхон» ҳимоядан ўйнади ва қарши ҳужумда ҳаракат қилишга уринди. Шунингдек, уларда жарима зарбаларидан яхши фойдалана оладиган футболчи бор. Яна «Сурхон» стандарт вазиятлардан яхши ўйнай олади.

Жамоа голли вазиятлардан фойдаланишда оқсади? Учта гол сизга кам кўринаётгани яхши. Бу жамоанинг ютуғи. Ҳамма зарбалар голга айланаверса, қизиқ бўлмасди. «Пахтакор»дан кўп нарса кутишади ва бу бизни хурсанд қилади», — дейди мутахассис.

Мазкур ғалабадан сўнг «Пахтакор»нинг очколари 18 тага етди ва жамоа якка пешқадам бўлиб турибди. «Сурхон» (4) эса 12-ўринда бормоқда.