Аргентина терма жамоаси афсонаси, ҳозирда «Ҳимнасия ва Эсгрима» клуби бош мураббийи Диего Марадона Испания терма жамоасини бошқариши мумкин. Бу ҳақда Marca хабар бермоқда.
Манбага кўра, агар Антонио Торрес Испания футбол федерациясининг янги президенти этиб тайинланса, Марадонанинг ушбу лавозимга келиш эҳтимоли ошади.
Торрес ҳам ўз хабарида аргентиналик мутахассиснинг вакиллари билан келишиб олганлигини маълум қилган. Марадона билан икки йилга мўлжалланган шартнома тузиш режалаштирилмоқда. Унинг вазифаси мамлакат бош жамоасини Қатарда бўлиб ўтадиган 2022 йилги Жаҳон Чемпионати финалига олиб чиқишдан иборат бўлади.
Ҳозирда Антонио Торреснинг Испания футбол федерацияси президентлиги учун асосий рақиби Луис Рубиалес бўлиб турибди. Айни пайтда Испания терма жамоасини Луис Энрике бошқармоқда.
Марадона 2019 йилнинг сентябрь ойидан бери «Ҳимнасия»ни бошқариб келмоқда. Унгача 59 ёшли мутахассис Мексиканинг «Дорадос», Бирлашган Араб Амирликларининг «Ал-Васл» ва «Ал-Фужайра» жамоаларида ишлаган, шунингдек, у Аргентина миллий жамоасини ҳам маълум вақт давомида бошқарган.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)