Ўзбекистон ва Россия ҳукумати ҳар икки мамлакат ўртасидаги саноат кооперациясини чуқурлаштириш бўйича «йўл харитаси»ни тасдиқлади, деб хабар бермоқда Инвестициялар ва ташқи савдо вазирлиги матбуот хизмати.
Ҳужжатда агросаноат мажмуаси, енгил саноат, электротехника, энергетика, автомобиль, нефть ва газ, ёғочни қайта ишлаш ва қишлоқ хўжалигида бир қатор янги лойиҳаларни амалга ошириш назарда тутилган.
Келишув 17 июнь куни бош вазир ўринбосари Сардор Умурзоқов ва Россия Бош вазирининг ўринбосари Алексей Оверчук ҳамраислигида видеоконференция шаклида бўлиб ўтди.
Томонлар, шунингдек, логистика соҳасида ҳамкорлик масалаларни, ҳар икки мамлакат ҳудудида мева-сабзавот маҳсулотларини сақлаш ва ташиш учун қўшма юк-экспедиторлик компаниялари, логистика ва улгуржи тақсимлаш марказларини яратиш истиқболларини муҳокама қилди.
«Бу транспорт харажатларини сезиларли даражада камайтиради, сифатни сақлаб қолган ҳолда ишлаб чиқарувчидан якуний истеъмолчига товарларни тезда етказиб беришни таъминлайди, бу эса Ўзбекистон ва Россия ўртасидаги ўзаро товар айланмаси ҳажмининг сезиларли ошишига олиб келади», — дейилади вазирлик хабарида.
Шунингдек, қўшимча қилинишича, келишилган лойиҳалар ва ташаббусларни жорий қилишни тезлаштириш ва ҳар ойда уларнинг амалга ошириш жараёнини ўрганиб бориш ҳамда Ўзбекистон ва Россия ишбилармон доираларини инвестицион шерикликни кенгайтириш бўйича мавжуд имкониятлар ва икки томонлама савдо ҳажмини ошириш механизмлари ҳақида хабардор қилиб бориш юзасидан келишувга эришилди.
Изоҳ (0)