Молия вазирлиги Инқирозга қарши курашиш жамғармасининг даромад ва харажатлари ҳақида маълумот берди.
Маълумотларга кўра, 17 июнь кунига қадар Молия вазирлиги ҳузуридаги Инқирозга қарши курашиш жамғарма ҳисобига жами 7,44 триллион сўм келиб тушган. Улардан 7,32 триллион сўми халқаро молия институтларининг имтиёзли кредитлари бўлса, қолган 123,5 миллиард сўми давлат бюджети ҳисобидан.
Иқтисодиётни қўллаб-қувватлаш
Энг кўп маблағ мамлакат иқтисодиётини қўллаб-қувватлаш учун сарфланган — жами 1,7 триллион сўм. Ушбу маблағнинг 500 миллиард сўми «Иссиқлик электр станциялари» АЖ корхоналарига, 401 миллиард сўм эса «Ўзбекнефтгаз» АЖга субсидия сифатида, 250 миллиард сўм «Ҳудудий электр тармоқлари» АЖга ссуда берилган. Шу билан бирга, авиация соҳасига жами 507 миллиард сўм сарфланган (406 миллиард сўм Uzbekistan Airways АЖга ва 101 миллиард Uzbekistan Airports АЖга ссуда берилган). Қолган 40 миллиард сўм эса «Биринчи Резинотехника заводи» МЧЖнинг харажатларини амалга ошириш учун сафарбар этилган.
Санитария-эпидемиологик осойишталик агентлиги
Инқирозга қарши курашиш жамғармасидан Санитария-эпидемиологик осойишталик агентлиги ҳисобига 661 миллиард сўм ўтказилган. Ушбу суммадан 248 миллиард сўм тест тизимлари, реактивлар ва ҳимоя воситаларини сотиб олиш учун сарфланган. Ҳудудий марказларга 366 миллиард сўм йўналтирилган: 338 миллиард сўм фуқароларни карантинда сақлаётган муассасалар ходимларининг иш ҳақи, озиқ-овқат, гигиена товарлари ва бошқа харажатларга; 19 миллиард сўм жамоат жойларини дезинфекция қилиш ишларига, 9 миллиард сўм эпидемиологик ҳолат билан курашиш бўйича тадбирларга сарфланган.
Бундан ташқари, карантин тадбирлари ва коронавирусга қарши курашда иштирок этаётган тиббиёт ходимлари ва бошқа ходимларига қўшимча рағбатлантириш учун тўловларга 36 миллиард сўм сарфланган. 11 миллиард сўм махсус автотранспорт воситаларини харид қилиш учун яратилган.
Сув таъминоти ва ирригация тадбирлари
Харажатлар қаторида 573 миллиард сўм сув таъминоти ва ирригация тадбирларига йўналтирилган. Бунда 246 миллиард сўм ирригация объектларини қуриш ва реконструкцияси учун, 61 миллиард сўм эса «Ҳудудий сув таъминоти» МЧЖга ссуда тариқасида ажратилган. Шунингдек, 57 миллиард сўм Жиззах вилояти Зафаробод туманидаги «Иншоот» объекти қурилишига, 53 миллиард сўм Давлат экология қўмитасига ссуда сифатида, 99 миллиард сўм Уй-жой коммунал хизмат кўрсатиш вазирлигига ичимлик суви таъминоти ва оқава сув чиқариш тизимларини қуришга, 16 миллиард сўм 20 минг ўринли аҳолини вақтинчалик карантинда сақлаш мажмуаси сув таъминоти учун, 14 миллиард сўм Сув хўжалиги вазирлигига — Жиззах вилоятидаги ирригация тадбирлари учун, 10 миллиард сўм Оролни қутқариш жамғармасининг ирригация тадбирларига, 9 миллиард сўм 2020 йилда мелиорация объектларини қуриш, реконструкция қилиш ишларига ва қолган 8 миллиард сўм 10 минг ўринли махсус шифохоналар сув таъминоти учун ажратилган.
Шифохоналарни қуриш ва жиҳозлаш
Жами 553 миллиард сўм шифохоналар ва карантин мажмуаларини қуриш ва жиҳозлаш учун сарфланган. Ушбу маблағнинг 286 миллиард сўми 10 минг ўринли махсус шифохоналар қуриш учун, 182 миллиард сўм 20 минг ўринли аҳолини вақтинчалик карантинда сақлаш мажмуасини қуриш учун, 66 миллиард сўм Қорақалпоғистон Республикаси, Самарқанд ҳамда Сурхондарё вилоятларида ташкил этиладиган махсус шифохоналар ва вақтинчалик карантинда сақлаш мажмуаларига, шунингдек, 10 миллиард сўм диагностика лабораторияси мажмуаси реконструкциясига, 9 миллиард сўм тиббий жиҳоз ва инвентарлар, дори-дармон, дезинфекция ишлари ва тиббий буюмлар учун сарфланган.
Ижтимоий соҳа
Инқирозга қарши курашиш жамғармасидан ижтимоий соҳага жами 929 миллиард сўм йўналтирилган. Бунда 60 миллиард сўм кам таъминланган оилаларда яшовчи хотин-қизларни қўллаб-қувватлаш учун Касаба уюшмалари федерациясига; 100 миллиард сўм банд бўлмаган фуқароларни вақтинчалик ишларга жалб қилиш учун Жамоат ишлари жамғармасига; 155 миллиард сўм ижтимоий нафақаларга; 310 миллиард сўм шаҳарлар ва кўча йўлларини таъмирлаш ишларига; 61 миллиард сўм Тошкент шаҳар маҳаллий бюджетига ссуда сифатида; 50 миллиард сўм шахсий томорқаларни ривожлантириш учун ишсиз, кам таъминланган, оилаларга; 83 миллиард сўм умумтаълим ва ихтисослаштирилган мактабларни қуриш, реконструкциялаш, жиҳозлаш ишларига; 80 миллиард сўм Президент мактабларини қуриш ва жиҳозлаш ишларига; 18 миллиард сўм «Тошкент метрополитени» ва «Тошшаҳартрансхизмат» ходимларига иш ҳақи тўлаш учун, 9 миллиард сўм «Ўзавтотранссервис» ва «Тошшаҳартрансхизмат» транспорт харажатларини қоплашга; 2 миллиард сўм «Ўзтемир йўловчи» АЖ фуқароларни манзилларига етказиб қўйиш харажатлари, 1 миллиард сўмлик гуманитар ёрдамни олиб келиши билан боғлиқ Мудофаа вазирлиги харажатлари учун ажратилган.
Изоҳ (0)