Тошкент шаҳрининг бир қатор кўчаларида режа асосида йўлларни жорий таъмирлаш ишлари олиб борилмоқда. Бу ҳақда Тошкент шаҳар ҳокимлиги матбуот хизмати хабар берди.
Хусусан, Чилонзор туманидаги энг серқатнов кўчалардан бири ҳисобланган Қатортол кўчасида 2560 квадрат метр асфальт ётқизилган. Чўпонота кўчасининг 8100 квадрат метр майдони ҳам янгидан асфальт қилинган.
«Чилонзор кўчасининг 6100 квадрат метр, Новза кўчасининг 3,5 квадрат метр майдонига асфальт ётқизилди», — дейилади ҳокимлик ахборотида. Ҳозирда Новза кўчасининг қолган қисми ҳамда Сеул кўчасида таъмирлаш ишлари давом этмоқда.
Асфальтлаш жараёнига 10 та махсус техника жалб қилинган, 40 нафар ишчи-ходим уч сменада ишламоқда. Ҳокимликнинг қайд этишича, таъмирлаш ишлари янги ва қопламаларни узоқ муддат сифатли сақловчи технология асосида олиб бормоқда.
Бундан ташқари, Юнусобод туманининг асосий кўчаларидан бири ҳисобланган Боғишамолда режа асосида йўл таъмирлаш ишлари олиб борилмоқда. Режага мувофиқ, Боғишамол кўчасининг 7500 квадрат метр майдони таъмирланиши кўзда тутилган.
3 июнь ҳолатига кўра кўчанинг 5500 квадрат метр қисмига янгидан асфальт ётқизиб бўлинган. Таъмирлаш жараёнига 20 дан ортиқ техника жалб этилган. «Ишлар махсус технология асосида, қурилиш ва таъмирлашдаги қоидалар асосида бажарилмоқда», — дейилади хабарда.
Изоҳ (0)