Ўзбекистон хорижий давлатлар билан авиақатновларни тиклаш учун «қизил», «сариқ» ва «яшил» рейсларни йўлга қўйишни режалаштирмоқда

Ўзбекистоннинг хорижий давлатлар билан авиақатновларини қайта тиклаш учун учун «қизил», «сариқ» ва «яшил» рейсларни йўлга қўйиш режалаштирилмоқда. Бу мамлакат ҳудудларининг карантин даражасига боғлиқ равишда «қизил», «сариқ» ва «яшил» тоифаларга бўлиниши каби бўлади. Бу ҳақда Ўзбекистон бош вазири ўринбосари — Туризмни ривожлантириш давлат қўмитаси раиси Азиз Абдуҳакимовга таяниб, «Gazeta.uz» хабар берди.

Азиз Абдуҳакимовнинг сўзларига кўра, эпидемиологик вазият мураккаб бўлган мамлакатлардан фақат «қизил» рейслар — Ўзбекистон фуқароларини ватанга қайтариш учун амалга оширилади. Эпидемиологик хавф ўртача бўлган мамлакатлардан «сариқ» рейслар амалга оширилади. Парвозлар нисбатан доимий асосда амалга оширилиши мумкин, бироқ барча йўловчилар карантинга олинади.

Коронавирус билан боғлиқ вазият тўлиқ назоратга олинган мамлакатлардан эса «яшил» рейслар амалга оширилади.

«Масалан, Япония, Жанубий Корея, Хитой — у ерларда янги ҳолатлар қайд этилмаяпти ёки барча нарса тегишли тиббий ва санитар хизматларнинг тўлиқ назорати остига олинган. Бу мамлакатлар билан босқичма-босқич халқаро авиақатновларни тиклаш ва Ўзбекистонга сайёҳлик гуруҳларини ташкил қилиш мумкин», — деди Азиз Абдуҳакимов.

Азиз Абдуҳакимов 27 май куни Президент Шавкат Мирзиёевга туризм соҳасидаги лойиҳаларни тақдим этганди. Ушрашувда 16 мартдан бошлаб мамлакатнинг хорижлик ва маҳаллий сайёҳлар учун ёпилгани сабабли 1500 дан ортиқ туроператор ва 1200 та меҳмонхона ўз фаолиятини тўхтатгани қайд этилганди. Бу эса 250 мингдан ортиқ одамнинг даромадига сезиларли даражада таъсир кўрсатган.

Давлат раҳбарига Uzbekistan. Safe travel guaranteed («Ўзбекистон. Кафолатланган хавфсиз саёҳат») лойиҳаси тақдим этилди. Лойиҳа сайёҳлар учун санитар-эпидемиологик хавфсизлик тизимини акс эттиради.

Азиз Абдуҳакимовнинг маълум қилишича, лойиҳа доирасида Санитария-эпидемиологик осойишталик агентлиги билан бирга туристик ва ёндош объектларда хавфсиз хизмат кўрсатиш бўйича давлат стандартлари ишлаб чиқилади ва тасдиқланади. Чоралар шахсий ҳимоя воситалари ва дезинфекцияловчи воситалардан фойдаланишни, ижтимоий масофага амал қилишни, хавфсизликни таъминлаш учун қурилмалар ва ускуналарни жорий қилишни назарда тутади.

Давлат ихтиёридаги объектларда бу чоралар мажбурий тартибда жорий қилинади. Бу объектларга назорат-ўтказиш пунктлари, аэропортлар, темир йўл ва автомобиль вокзаллари, давлат моддий-маданий мерос объектлари, музейлар, театрлар ва бошқалар киради.

Санитария-эпидемиологик осойишталик агентлигининг ижобий хулосасини олган объектлар Туризмни ривожлантириш давлат қўмитасининг Хавфсиз туризм объектлари реестрига киритилади.

Тадбиркорлик субъектлари учун ихтиёрий асосда сертификациядан ўтиш тизими ишлаб чиқилади. Меҳмонхоналар, кафелар, ресторанлар, хусусий маданий муассасалар ва сайёҳлар учун мўлжалланган кўнгилочар объектлар эгалари Туризмни ривожлантириш давлат қўмитаси ҳузуридаги марказга ариза бериши керак бўлади. Сертификат стандартларга мос келадиган объектларга берилади. Сертификат олган объектлар ҳам Хавфсиз туризм объектлари реестрига киритилади.

Бундан ташқари, жамоатчилик ташкилотлари вакилларидан иборат ишчи гуруҳ тузилади ва бу гуруҳ объектларда санитария меъёрлари ва қоидаларига амал қилиниши юзасидан мониторинг олиб боради. Шунингдек, ишчи гуруҳ Хавфсиз туризм объектлари реестрини кенгайтириш бўйича таклифлар беради.

Туроператорлар фақат Хавфсиз туризм объектлари реестрига киритилган объектларга саёҳатлар ташкил қилиши керак бўлади.

Бундан ташқари, туристларнинг ҳаракатланиш йўналишини кузатиш учун мобил дастур яратиш режалаштирилмоқда. Uzbekistan. Safe travel guaranteed лойиҳаси хорижий фуқароларни инфексион касалликлардан суғурта қилиш тизимини жорий этишни кўзда тутади. Шунингдек, ҳукумат Uzbekistan. Safe travel guaranteed бренди остида маркетинг стратегиясини ишлаб чиқади.

Эслатиб ўтамиз, 1 июндан Ўзбекистоннинг «яшил» ва «сариқ» ҳудудларида ички туризмга рухсат этилди. Шу санадан бошлаб мазкур ҳудудларда туроператорлар, туризм агентликлари, меҳмонхона ва бошқа жойлаштириш объектлари, маданий, маданий мерос объектлари ва бошқалар санитария-гигиена меъёрлари ва талабларига қатъий амал қилган ҳолда ўз фаолиятини бошлади. Туризмни қайта тиклаш учун мазкур соҳа вакилларига Президент фармони билан бир қатор имтиёзлар ва субсидия дастурлари тақдим этилди. Шунингдек, 1 июндан бошлаб «яшил» ҳудудларда санаторийлар, пансионатлар, болалар оромгоҳлари, меҳмон уйлари, бошқа дам олиш масканлари ва жойлаштириш воситалари фаолиятига ҳам рухсат берилди.