Путин Москвада ўтадиган Ғалаба парадига барча МДҲ давлатлари раҳбарларини таклиф қилди

Тожикистон президенти Эмомали Раҳмон Иккинчи жаҳон урушида Германия устидан қозонилган ғалабанинг 75 йиллигига бағишланган ва 24 июнь куни Москвада бўлиб ўтадиган ҳарбий парадда иштирок этади. Бу ҳақда «РИА Новости» хабар берди.

Тожикистон президенти ижро аппарати томонидан маълум қилинишича, Эмомали Раҳмон Россия президенти томонидан юборилган парадда иштирок этиш ҳақидаги таклифни қабул қилган.

Қайд этилишича, айни пайтда Тожикистон президентининг Москвага ташрифи билан боғлиқ ташкилий масалалар устида иш олиб борилмоқда.

Таъкидланишича, Владимир Путин Ғалаба парадига МДҲ таркибига кирувчи барча мамлакатлар етакчиларини таклиф қилган.

Эслатиб ўтамиз, Владимир Путин коронавирус тарқалиши билан боғлиқ вазият сабаб 9 майда ўтиши лозим бўлган Ғалаба парадининг ўтказилишини кечиктирган, бироқ тадбирларнинг қайси санада ўтишига аниқлик киритмаганди. Кейинроқ Путин параднинг 24 июнь куни ўтказилишини маълум қилди.