Давлат хавфсизлик хизмати ходимларининг прокуратура ва ички ишлар органлари вакиллари билан Қарши шаҳрида ўтказган тезкор тадбири давомида фуқаро Фурқат Очилов фирибгарлик йўли билан Нишон тумани ички ишлар бўлими профилактика инспекторидан 200 долларни олаётган вақтида ушланди. Бу ҳақда «Дарё»га ДХХ томонидан маълум қилинди.
Аниқланишича, Фурқат Очилов профилактика инспекторига қўнғироқ қилиб, ўзини ДХХ ходими дея таништирган ва унга нисбатан Нишон туманидаги деҳқон бозори ҳамда туман ҳокимлиги олдидаги иккита ҳолат бўйича видеоёзув борлигини айтиб, уни алдаган. Фурқат Очилов агар профилактика инспектори 200 доллар берса, унинг ноқонуний хатти-ҳаракатлари тасвирланган ушбу видеоёзувлар билан боғлиқ муаммони ҳал қилиб беришини билдирган.
Тезкор тадбир давомида Китоб туманида туғилган Фурқат Очиловнинг ёнидан ДХХ Чегара қўшинларининг сохта гувоҳномаси ва бир нечта фуқаронинг паспорт нусхалари ҳамда фотосуратлари топилди. Шунингдек, у вақтинчалик яшаб келган Нишон тумани «Улуғбек» МФЙдаги уйдан лейтенант унвонидаги ДХХнинг ҳарбий кийими ашёвий далил сифатида олинди.
Таъкидланишича, мазкур шахс муқаддам фирибгарлик билан боғлиқ жиноят содир этганлиги учун унга нисбатан ички ишлар органлари томонидан жиноят иши қўзғатилиб, қидирув эълон қилинган.
Ҳозирда тергов ҳаракатлари доирасида Фурқат Очиловга сохта гувоҳномани ким тайёрлаб бергани ва ундан жабр кўрган яна бошқа фуқароларни ҳам аниқлаш бўйича тегишли чора-тадбирлар амалга оширилмоқда.
