Ўзбекистон бош давлат санитария инспектори Нурмат Отабеков нима сабабдан сўнгги кунларда мамлакатда аҳоли орасида коронавирусга чалиниш ҳолат кўпаяётганига изоҳ берди.
Унинг сўзларига кўра, карантин чоралари юмшатилганидан сўнг кўпчилик карантин қоидаларига риоя қилмай қўйди. Одамлар ниқобларни ҳафталаб алмаштирмай, ижтимоий масофага риоя қилмай қўйди. Кенг аҳоли қатлами билан мулоқот бошланиб кетгани натижасида аҳоли орасида коронавирус юқтирганлар аниқлана бошланди.
Нурмат Отабековнинг таъкидлашича, мамлакатда карантин тадбирлари ҳали бекор қилинмаган. Аҳоли орасида касалланиш суръати шу тарзда ошиб борса, карантин тадбирлари янада кучайтирилиши мумкин.
Шунингдек, Нурмат Отабеков нима сабабдан республикада касаллик енгил ўтаётганига, қарийб 80 фоиз бемор касалликдан тузалаётганига ҳам изоҳ берди.
Қайд этилишича, коронавирус инфекцияси, асосан, 80 фоиз ҳолатда енгил кечади, 15 фоиз ҳолатда ўрта оғирликда ва фақат 3-5 фоиз ҳолатда оғир, яъни нафас етишмовчилиги билан кечади. Касалликка чалинганларни эрта аниқлаш ишларининг йўлга қўйилганлиги касаллик кечишида ижобий натижаларга эришиш имконини бермоқда.
«Бироқ вируснинг културал, морфологик, антиген, серологик хусусиятлари, вирулентлиги, патогенлиги каби масалалар ҳали кўплаб ўрганилади. Шунинг учун аниқ бирор тўхтамга келишга ҳали эрта», — деди Нурмат Отабеков.
Сўнгги кунларда, асосан, Тошкент шаҳри, Самарқанд ва Навоий вилоятларида аҳоли орасида коронавирусга чалинганлар сони ортиб бормоқда. Шунингдек, 1 июнь куни Сирдарё вилоятида ҳам аҳоли орасида коронавирусга чалиниш ҳолати аниқланди. Бундан ташқари, Ўзбекистонда 30 май куни 2646 киши карантинга олингани маълум қилинди.
Изоҳ (0)