Наманганда журналистлар учун бош соврин Spark бўлган танлов эълон қилинди

Наманганда журналистлар учун бош соврин Spark бўлган танлов эълон қилинди. Бу ҳақда «Дарё» мухбири Азизбек Абдувалиев хабар бермоқда.

Ўтган йили матбуот байрамида вилоят ҳокими Хайрулло Бозоров Наманганда рўй бераётган воқеа-ҳодисаларни мамлакат ва халқаро ахборот маконида кенг ёритган, бу борада энг катта аудиторияга эришган журналистга келгуси йили Spark автомобилини бериш таклифини билдирганди.

Ушбу ташаббусдан келиб чиқиб, вилоят ҳокимлиги ва Журналистлар ижодий уюшмаси вилоят бўлими томонидан «Дунёга бўйлаётган Наманган» танлови эълон қилинди.

Танловга теле, радио, босма материаллар ҳамда интернет нашрларида эълон қилинган муаллифлик ишлари тақдим этилади. Плагиат ҳолати аниқланган ва бошқа манбалардан кўчириб босилган материаллар қабул қилинмайди.

Ғолибни аниқлашда материаллар жанри, ҳажми, сифати, таъсирчанлик ва натижадорлик даражасига қараб баҳо берилади. Тақдим этилган материалларда чоп қилинган нашрларнинг аудиторияси ҳамда аудиториянинг географияси устувор мезон ҳисобланади. Ривожланган хорижий мамлакатларнинг йирик ОАВларида чоп этилган материалларга устунлик берилади.

Танлов ғолиби 27 июнь — Матбуот ва оммавий ахборот воситалари ходимлари куни эълон қилиниши кўзда тутилмоқда.