Namanganda jurnalistlar uchun bosh sovrin Spark bo‘lgan tanlov e’lon qilindi

Namanganda jurnalistlar uchun bosh sovrin Spark bo‘lgan tanlov e’lon qilindi. Bu haqda “Daryo” muxbiri Azizbek Abduvaliyev xabar bermoqda.

O‘tgan yili matbuot bayramida viloyat hokimi Xayrullo Bozorov Namanganda ro‘y berayotgan voqea-hodisalarni mamlakat va xalqaro axborot makonida keng yoritgan, bu borada eng katta auditoriyaga erishgan jurnalistga kelgusi yili Spark avtomobilini berish taklifini bildirgandi.

Ushbu tashabbusdan kelib chiqib, viloyat hokimligi va Jurnalistlar ijodiy uyushmasi viloyat bo‘limi tomonidan “Dunyoga bo‘ylayotgan Namangan” tanlovi e’lon qilindi.

Tanlovga tele, radio, bosma materiallar hamda internet nashrlarida e’lon qilingan mualliflik ishlari taqdim etiladi. Plagiat holati aniqlangan va boshqa manbalardan ko‘chirib bosilgan materiallar qabul qilinmaydi.

G‘olibni aniqlashda materiallar janri, hajmi, sifati, ta’sirchanlik va natijadorlik darajasiga qarab baho beriladi. Taqdim etilgan materiallarda chop qilingan nashrlarning auditoriyasi hamda auditoriyaning geografiyasi ustuvor mezon hisoblanadi. Rivojlangan xorijiy mamlakatlarning yirik OAVlarida chop etilgan materiallarga ustunlik beriladi.

Tanlov g‘olibi 27-iyun — Matbuot va ommaviy axborot vositalari xodimlari kuni e’lon qilinishi ko‘zda tutilmoqda.