Сардоба сув омборида юзага келган тошқин оқибатида Сирдарё вилоятига чегарадош бўлган қўшни Қозоғистоннинг Туркистон вилояти, Мақтаарал тумани қишлоқларига ҳам талафот етганди. Сирдарё тумани ҳокимлиги хабарига кўра, Мақтаарал туманига махсус техникалар юборилди.
Шавкат Мирзиёев топшириғига биноан ушбу техоген офат оқибатларини бартараф этиш учун Фавқулодда вазиятлар вазирлиги томонидан бир гуруҳ матахассислар ва махсус техникалар юборилган эди.
«24 май куни эса Сирдарё вилояти ҳокимлиги томонидан қўшни давлатнинг Мақтаарал туманига ‘Бахт юксалишда’ ҳамда Poly Тех кластерларига қарашли 20 га яқин замонавий, юқори унумли New HollandT 6070 ҳамда ТD5, Djon Dir махсус техникалар дастлаб дезинфекция қилиниб, агрегатлари билан юборилди», — дейилади ҳокимлик хабарида.
Қайд этилишича, бу техникалар орқали тошқин оқибатида зарар кўрган экин ер майдонларига ишлов берилади ҳамда талафот оқибатларини тугатишни сезиларли даражада тезлашади.
Эслатиб ўтамиз, Сардоба сув омборидаги сув тошқини оқибатида Қозоғистоннинг Туркистон вилояти Мақтаарал тумани ҳудудида техноген хусусиятга эга фавқулодда ҳолат эълон қилинганди. Сўнгги маълумотларга кўра, тошқин натижасида вилоят ҳудудида 30 мингдан ортиқ одам эвакуация қилинган. Мазкур фавқулодда ҳолатни муҳокама қилиш учун Қозоғистон расмийлари Ўзбекистонга ташриф буюрганди.
Президент Шавкат Мирзиёев 5 май куни бўлиб ўтган видеоселектор йиғилишида Ўзбекистон ҳукумати Сардоба сув омборидаги фалокат сабаб қўшни мамлакатда юз берган сув тошқинлари оқибатларини бартараф этишда қозоғистонлик ҳамкасблари билан яқиндан ҳамкорлик қилишини билдирди.
Изоҳ (0)