2020 йилнинг 20 апрель куни Қашқадарё вилояти Қамаши туманида Мажбурий ижро бюроси ходими ва фуқаро ўртасида юз берган тортишув видеоси ижтимоий тармоқларда тарқалди. Мажбурий ижро бюроси мазкур ҳолат бўйича ўрганиш олиб борди ва бу ҳақда «Дарё»га маълумот берди.

Фото: Мажбурий ижро бюроси

Аниқланишича, Чироқчи туман иқтисодий судининг 2020 йил 7 январдаги қарорига асосан, қарздор «Қўзиева Холида Боймуродовна» хусусий корхонасининг Қамаши туман Давлат солиқ инспекцияси олдида 11,2 миллион сўм солиқ қарзи ҳамда давлат фойдасига 223 000 сўм давлат божи тўлаш мажбурияти бўлган. Мазкур қарздорликни ундириш ҳақидаги ижро ҳужжати МИБнинг Қамаши туман бўлим иш юритувига 12 январь куни келиб тушган ва шу куннинг ўзида ижро иши қўзғатилиб, қарздорга ижро қилиш учун маълум қилинган.

Хабар берилишича, қарздор қарздорликни бартараф этиш юзасидан бир неча бор огоҳлантирилишига қарамасдан, мазкур мажбуриятини бажармаган. Шу боис 16 апрель куни мажбурий ижро ҳаракатларига киришилган ва қарздор корхонага тегишли бўлган бир дона дарвоза хатланиб, реализация қилиш учун олиб кетилган.

Мазкур ҳолатда хатловга олинган корхонага қарашли маъмурий бинода ўрнатилган дарвозани олиш учун МИБ ходимлари борганда, корхона раҳбарининг оила аъзолари давлат ижрочиси А.Самиев ва бошқаларнинг фаолиятига қаршилик қилган.

Қамаши туман маъмурий судининг 22 апрелдаги қарори билан ҳуқуқбузар С.Ж. Маъмурий жавобгарлик тўғрисидаги кодекснинг 47-моддаси 1-қисми, 198-моддаси 1-қисми, 183-моддаси ва 194-моддасининг 1-қисмида назарда тутилган ҳуқуқбузарликларни содир этган деб топилган. Суд қарорига асосан, С.Ж.га беш суткалик маъмурий қамоқ ва 557 500 сўм жарима жазоси тайинланган.

Шунингдек, С.Ж.нинг маъмурий қамоқда сақланган муддати учун 167 250 сўм давлат фойдасига пул ундириш белгиланган.

Қайд этилишича, мазкур ҳолат юзасидан МИБнинг Қамаши туман бўлими давлат ижрочилари И.Турсунов ва бошқаларга нисбатан хизмат текшируви ўтказилди.

Хизмат текшируви натижасига кўра, ҳолат юзасидан фуқаро С.Ж. томонидан кўрсатилган важлари ўз тасдиғини топмаганлиги сабабли Мажбурий ижро бюроси Қамаши туман бўлими давлат ижрочилари А.Самиев, И.Турсунов, Ш.Файзуллаев хизмат фаолияти давомида ножўя хатти-ҳаракатлар содир қилмаган деб топилди ва тўпланган ҳужжатлар қонуний қарор қабул қилиш учун Қамаши туман прокуратурасига юборилди.